काठमाडौं । पूर्वप्रधानमन्त्री तथा नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ले नयाँ शक्तिका नाममा भइरहेको चर्चालाई होहल्ला मात्र भएको टिप्पणी गरेका छन्।
काठमाडौंमा आयोजित एक कार्यक्रमलाई सम्बोधन गर्दै संयोजक दाहालले संघीय लोकतान्त्रिक गणतन्त्र स्थापना गर्ने तथा उत्पीडित वर्गको हक–अधिकार सुनिश्चित गर्ने आफ्नो पार्टी नै मुलुकको सबैभन्दा नयाँ र प्रगतिशील शक्ति भएको दाबी गरे।
उनले पछिल्लो समय सामाजिक सञ्जालमा ‘नयाँ शक्ति’को नाममा गरिएको प्रचारप्रति आपत्ति जनाउँदै विचार र एजेण्डाका आधारमा मात्र को नयाँ र को पुरानो भन्ने छुट्याउनुपर्ने बताए।
‘आजभोलि नयाँ–नयाँ भन्ने नाममा सामाजिक सञ्जालमार्फत होहल्ला गरिएको छ। तर नेपालमा हामीभन्दा नयाँ कोही छैन। नेपाली कम्युनिष्ट पार्टी नै सबैभन्दा नयाँ हो, किनकि यही पार्टी गणतन्त्र र संघीयताको वाहक हो,’ प्रचण्डले भने।
संयोजक दाहालले महिला, दलित, आदिवासी, जनजाति, मधेसी, मुस्लिम तथा थारू समुदायलाई पहिचान र अधिकार दिलाउने एकमात्र पार्टी आफ्नो भएको जिकिर पनि गरे।
उनका अनुसार राष्ट्र र जनताको हितमा समर्पित हुने, विचार र एजेण्डाका आधारमा अघि बढ्ने शक्ति नै वास्तविक अर्थमा नयाँ शक्ति हो।
