काठमाडौँ । राष्ट्रिय सभाका नेपाली कांग्रेस सांसद आनन्दप्रसाद ढुंगानाले सर्वोच्च अदालतले संसद् पुनःस्थापनासम्बन्धी मुद्दामा समयमै फैसला नगरेकोप्रति असन्तुष्टि व्यक्त गरेका छन्।
शुक्रबार राष्ट्रिय सभाको बैठकमा विशेष समय लिएर बोल्दै सांसद ढुंगानाले उक्त टिप्पणी गरेका हुन्। उनले सर्वोच्च अदालतका न्यायाधीशहरू यसरी निरीह बनेको अवस्था आफूले यसअघि कहिल्यै नदेखेको दाबी गरे।
पञ्चायतकालमा समेत न्यायाधीशहरूले मुद्दाको किनारा लगाउने कार्यलाई प्राथमिकता दिने गरेको उदाहरण प्रस्तुत गर्दै अहिले त्यो अवस्था नदेखिनु चिन्ताको विषय भएको उनले बताए।
‘यो देशको राष्ट्रियता कमजोर बन्दै गएको छ। संसद् पुनःस्थापनाका लागि मुद्दा परेको छ तर अहिलेसम्म फैसला भएको छैन,’ उनले भने, ‘न्यायाधीशहरू यति निरीह भइरहनु भएको छ। पञ्चायत वा राजाको शासनकालमा पनि राजकाजसम्बन्धी मुद्दा पर्दा तत्काल फैसला हुन्थ्यो, तर आज त्यस्तो अवस्था छैन।’
सांसद ढुंगानाले सरकारले राष्ट्रिय हितका विषयमा आवश्यक ध्यान दिन नसकेको आरोपसमेत लगाए।
