काठमाडौं– रौतहटमा चुनावी अभियानका क्रममा प्रयोग गरिएको सवारी साधनको ठक्करबाट चार वर्षीया बालिकाको निधन भएको घटनाप्रति राष्ट्रिय स्वतन्त्र पार्टी (रास्वपा) ले गहिरो दुःख व्यक्त गरेको छ।
पार्टीका महामन्त्री कविन्द्र बुर्लाकोटीले शुक्रबार जारी गरेको विज्ञप्तिमा उक्त घटनाले पार्टीलाई अत्यन्तै स्तब्ध र मर्माहत बनाएको उल्लेख गरेका छन्। विज्ञप्तिमार्फत उनले मृतक बालिकाप्रति श्रद्धाञ्जली अर्पण गर्दै पीडित परिवारप्रति समवेदना व्यक्त गरेका छन्।
रास्वपाले घटनालाई गम्भीर रूपमा लिँदै वस्तुनिष्ठ छानबिनका लागि स्थानीय प्रशासनलाई पूर्ण सहयोग गर्ने प्रतिबद्धता जनाएको छ। कानुनी प्रक्रिया पूरा गरी पीडित परिवारलाई न्याय दिलाउन पार्टीले कुनै कसर बाँकी नराख्ने पनि विज्ञप्तिमा उल्लेख गरिएको छ।
त्यसैगरी, पीडित परिवारलाई राहत तथा सहयोग उपलब्ध गराउन पार्टीका तर्फबाट आवश्यक पहल भइरहेको महामन्त्री बुर्लाकोटीले जनाएका छन्।
पार्टीले आगामी दिनमा यस्ता दुःखद घटना दोहोरिन नदिन चुनावी अभियानका क्रममा प्रयोग हुने सवारी साधनको परिचालनमा उच्च सतर्कता अपनाउन निर्देशन दिएको छ। उम्मेदवार, पार्टीपंक्ति तथा सवारी चालकहरूलाई सुरक्षा संवेदनशीलतालाई प्राथमिकतामा राखी जिम्मेवार ढंगले कार्य गर्न कडा निर्देशन जारी गरिएको रास्वपाले जनाएको छ।
