काठमाडौं — सरकारले विवादमा रहेको ‘सामाजिक सञ्जाल विधेयक, २०८१’ राष्ट्रियसभाबाट फिर्ता लिने प्रक्रिया अघि बढाएको छ। आज बस्ने राष्ट्रियसभाको बैठकमा प्रधानमन्त्री एवं सञ्चार तथा सूचना प्रविधिमन्त्री सुशीला कार्कीले उक्त विधेयक फिर्ता गरियोस् भन्ने प्रस्ताव प्रस्तुत गर्ने कार्यसूची रहेको छ।
गत मङ्गलबार बसेको मन्त्रिपरिषद् बैठकले सामाजिक सञ्जाल विधेयक सङ्घीय संसद्बाट फिर्ता लिन स्वीकृति दिने निर्णय गरेको थियो। १७ औँ अधिवेशनमा दर्ता भएको यो विधेयक हाल राष्ट्रियसभा विधायन व्यवस्थापन समितिमा विचाराधीन अवस्थामा रहेको थियो।
आजको बैठकमा प्रधानमन्त्री कार्कीले अर्को महत्वपूर्ण विधेयक अघि बढाउने तयारीसमेत गरेकी छन्। सम्भावित कार्यसूचीअनुसार उनले ‘राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८१’ लाई पारित गरियोस् भन्ने प्रस्ताव पेश गर्नेछिन्।
त्यसअघि प्रधानमन्त्री कार्कीले विधायन व्यवस्थापन समितिको प्रतिवेदनसहित सोही विधेयकमाथि छलफल गरियोस् भन्ने प्रस्ताव प्रस्तुत गर्ने कार्यक्रम रहेको छ।
बैठकमा सार्वजनिक नीति तथा प्रत्यायोजित विधायन समितिका सभापति मायाप्रसाद शर्माले ‘राष्ट्रिय निकुञ्जसँग सम्बन्धित नीतिगत समस्यासम्बन्धी समितिको अध्ययन प्रतिवेदन, २०८२’ माथि छलफल गरियोस् भन्ने प्रस्ताव पनि पेश गर्नेछन्।
संसद् सचिवालयका अनुसार राष्ट्रियसभाको बैठक आज अपराह्न १ः१५ बजे बस्नेछ। यसैबीच, राष्ट्रियसभा विधायन व्यवस्थापन समितिको बैठक आज बिहान ११ बजे बस्दैछ। बैठकमा अभौतिक सांस्कृतिक सम्पदा (संरक्षण) विधेयक, २०८१ माथि दफावार छलफल हुने समितिका सभापति तुलसाकुमारी दाहालले जानकारी दिएकी छन्।
