खोटाङ — भारतको मेघालय राज्यस्थित कोइलाखानीमा भएको विस्फोटमा परेर खोटाङका एकाघरका दाजुभाइको मृत्यु भएको छ।
बिहीबार मेघालयको उम्साङघाटस्थित कोइलाखानीमा ब्लास्टिङ गर्ने क्रममा आगलागी हुँदा बराहपोखरी गाउँपालिका–१, बराहपोखरी सालघारीका २७ वर्षीय पूर्णबहादुर खपाङ्गी र उनका २४ वर्षीय भाइ सुरेन्द्र खपाङ्गीको ज्यान गएको हो।
उक्त घटनामा बराहपोखरी भञ्ज्याङका बमबहादुर खपाङ्गी, सालघारीका कर्णबहादुर खपाङ्गी, नरबहादुर खपाङ्गी तथा उदयपुर साउनेका ललित मगर घाइते भएका छन्। उनीहरूमध्ये चार जनाको अवस्था गम्भीर रहेको बताइएको छ।
सात जनाको टोलीमध्ये बराहपोखरी बालम्पाका ताराबल मगर भने सकुशल रहेका छन्। ताराबलले फोनमार्फत घटनाबारे जानकारी गराएको शिवकुमार श्रेष्ठले जानकारी दिए।
घटनाको विस्तृत विवरण आउन बाँकी रहेको छ। उनीहरू रोजगारीका लागि गत पुस ३ गते मेघालय गएका थिए। खोटाङका विभिन्न स्थानका स्थानीयहरू रोजगारीको खोजीमा मेघालय जाने गरेको बताइन्छ।
बीबीसीका अनुसार उक्त दुर्घटनामा परी ज्यान गुमाउनेको संख्या १८ पुगेको छ। भारतीय प्रधानमन्त्री नरेन्द्र मोदीले घटनाप्रति दुःख व्यक्त गर्दै मृतकका परिवारलाई प्रतिव्यक्ति २–२ लाख रुपैयाँ राहत दिने घोषणा गरेका छन्। साथै, घाइतेलाई ५० हजार रुपैयाँ सहयोग उपलब्ध गराइने पनि उनले बताएका छन्।
