चितवन । स्थानीय प्रशासनले तोकेको स्थानभन्दा बाहिर कार्यक्रम गरेपछि दुर्गा प्रसाईं र उनका समर्थकहरूले सोमबार भरतपुरमा आयोजना गरेको कार्यक्रममा प्रहरीले हस्तक्षेप गरेको छ।
प्रसाईं पक्षले भरतपुरको चौबिसकोठी चोकमा कार्यक्रम गर्न थालेपछि प्रहरीले हटाउन खोज्दा झडप र धकेलाधकेलको अवस्था सिर्जना भएको हो।
झडपका क्रममा प्रसाईंका तीन जना कार्यकर्तालाई पक्राउ गरिएको जिल्ला प्रहरी कार्यालय चितवनका प्रवक्ता प्रहरी नायब उपरीक्षक रविन्द्र खनालले जानकारी दिए।
उनका अनुसार, “प्रशासनले स्वीकृति दिएको स्थानभन्दा बाहिर कार्यक्रम गरेपछि हटाउने क्रममा तीन जनालाई नियन्त्रणमा लिएका छौं।”
प्रशासनले प्रसाईंको समूहलाई केन्द्रीय बस टर्मिनल चोकको एक कुनामा कार्यक्रम गर्न अनुमति दिएको थियो। तर प्रसाईं पक्षले चौबिसकोठी चोक परिक्रमा गर्दै बसपार्क चोकमा कार्यक्रम गर्ने अडान लिएपछि तनाव बढेको प्रहरीको भनाइ छ।
प्रहरीले चौबिसकोठी परिक्रमा गर्न अनुमति दिएको भए पनि परिक्रमा नगरी सोही स्थानमै कार्यक्रम गर्न खोजेपछि हस्तक्षेप गर्नुपरेको जनाइएको छ।
