काठमाडौँ – गृहमन्त्री ओमप्रकाश अर्यालले गृह मन्त्रालयले नेपाल प्रहरीलाई नियन्त्रण गर्ने नभई अझ सक्षम र व्यावसायिक बनाउने लक्ष्य राखेको स्पष्ट पारे।
सोमबार काठमाडौँमा आयोजित नेपाल प्रहरी निरीक्षकहरूको दीक्षान्त समारोहलाई सम्बोधन गर्दै गृहमन्त्री अर्यालले गृह मन्त्रालय प्रहरीलाई आदेश दिने निकाय मात्र नभई अभिभावकको भूमिकामा रहेको बताए।
प्रहरीलाई नीतिगत स्पष्टता, संस्थागत मजबुती तथा व्यावसायिक स्वतन्त्रता प्रदान गर्न सरकार प्रतिबद्ध रहेको उनको भनाइ छ। साथै, शक्ति दुरुपयोग रोक्न र भ्रष्टाचार नियन्त्रणका लागि पूर्ण रूपमा तटस्थ, व्यावसायिक र कानुनअनुसार मात्र परिचालन हुन निर्देशन दिए।
गृहमन्त्री अर्यालले कुनै पनि तत्वले नेपाल प्रहरीको निष्पक्षतालाई कमजोर पार्न नपाउने स्पष्ट पार्दै विगतका निर्वाचनझैँ यसपटक पनि प्रहरीले निर्वाचन सफलतापूर्वक सम्पन्न गरेर आफ्नो व्यावसायिक दक्षता प्रमाणित गर्ने विश्वास व्यक्त गरे।
