१९ माघ, धनगढी।
सुदूरपश्चिम प्रदेशमा आगामी २१ फागुनमा हुने निर्वाचनलाई लक्षित गर्दै सुरक्षा व्यवस्थालाई कडा बनाइएको छ। प्रदेश प्रहरी कार्यालय धनगढीले सुरक्षा चुनौतीको विश्लेषणपछि ७ हजार ५८ जना प्रहरी परिचालन गर्ने निर्णय गरेको छ।
प्रदेश प्रहरी कार्यालयका प्रवक्ता वरिष्ठ प्रहरी उपरीक्षक (एसएसपी) पदमबहादुर विष्टका अनुसार नियमित प्रहरीसँगै १३ हजार ६६९ जना निर्वाचन प्रहरी खटाइनेछन्। त्यस्तै, सशस्त्र प्रहरीतर्फ १ हजार ५१९ जना निर्वाचन सुरक्षामा परिचालन हुनेछन्।
प्रदेश निर्वाचन कार्यालयका अनुसार सुदूरपश्चिममा १७ लाख १६ हजार ६७५ मतदाता रहेका छन्। तीमध्ये ८ लाख ६४ हजार ४२३ महिला र ८ लाख ५२ हजार २१९ पुरुष मतदाता छन्।
सुरक्षा संवेदनशीलताका आधारमा प्रदेशभर रहेका १ हजार १७६ मतदान स्थल र २ हजार १९९ मतदान केन्द्रको वर्गीकरण गरिएको छ।
मतदान स्थलतर्फ ३०० सामान्य, ३९५ संवेदनशील र ४८१ अतिसंवेदनशील रहेका छन् भने मतदान केन्द्रमध्ये ४५६ सामान्य, ७५७ संवेदनशील र ९८६ अतिसंवेदनशील सूचीमा परेका छन्।
सामान्य मतदान केन्द्रमा ५ जना, संवेदनशीलमा ६ जना र अतिसंवेदनशीलमा १० जना प्रहरी खटाइनेछ। मतदान स्थलको भित्री सुरक्षासँगै बाहिरी सुरक्षामा समेत थप प्रहरी परिचालन गरिने जनाइएको छ।
यसपटक सुदूरपश्चिम प्रदेशमा २४ राजनीतिक दल निर्वाचनमा सहभागी छन्। विगतका निर्वाचनका घटनाका आधारमा बाजुरा, बझाङ, अछाम र दार्चुला जिल्लालाई अतिसंवेदनशील घोषणा गर्दै विशेष सुरक्षा व्यवस्था गरिएको छ।
यसैबीच, निर्वाचन केन्द्रित सुरक्षा अवस्थाको अध्ययनका लागि एआईजी हिमालय श्रेष्ठको नेतृत्वमा विशेष टोली धनगढी पुगेको छ। टोलीले प्रदेशको समग्र सुरक्षा अवस्था, जनशक्ति परिचालन र जोखिम मूल्यांकन गर्नेछ।
