काठमाडौँ – टेक दिग्गज कम्पनी एप्पलले सामान्यतया प्रत्येक सेप्टेम्बरमा चार नयाँ आईफोन मोडेल सार्वजनिक गर्दै आएको भए पनि यसपटक आफ्नो लन्च रणनीतिमा ठूलो परिवर्तन गर्ने तयारी गरेको छ।
जापानी मिडिया कम्पनी निक्केई एसियाको रिपोर्टअनुसार एप्पलले २०२६ मा हुने वार्षिक कार्यक्रममा आईफोन १८ को आधार (स्ट्यान्डर्ड) मोडेल लन्च नगर्ने सम्भावना देखिएको छ। उक्त मोडेललाई २०२७ को पहिलो आधासम्म स्थगित गर्न सकिने उल्लेख गरिएको छ।
रिपोर्टका अनुसार मेमोरी चिप्स तथा अन्य कम्पोनेन्टको लागत बढ्दै गएपछि एप्पलले यस्तो निर्णय लिन लागेको हो। प्रिमियम मोडेलमार्फत बढी राजस्व र नाफा आर्जन गर्न कम्पनीले आफ्ना स्रोतहरू त्यतैतर्फ केन्द्रित गर्न खोजेको बताइएको छ।
ब्लूमबर्गका प्रविधि विश्लेषक मार्क गुरम्यान र प्रख्यात विश्लेषक मिङ(ची कुओले पनि एप्पलले यस वर्ष आईफोन १८ को स्ट्यान्डर्ड संस्करण सार्वजनिक नगर्ने संकेत गरेका छन्। उनीहरूका अनुसार आईफोन १८ सम्भवतः २०२७ को सुरुआतमा ‘आईफोन १८e’ मोडेलसँगै लन्च हुन सक्छ।
एप्पलको यो निर्णयको अर्को प्रमुख कारण कम्पनीको पहिलो फोल्डेबल आईफोन पनि रहेको बताइएको छ। फोल्डेबल फोन उत्पादनका लागि जटिल औद्योगिक प्रक्रिया र नयाँ सामग्री आवश्यक पर्ने भएकाले ठूलो मात्रामा उत्पादन गर्दा प्राविधिक जोखिम नहोस् भन्नेमा एप्पल सचेत देखिएको छ। त्यसैले कम्पनीले आफ्ना प्रयासहरू फोल्डेबल र प्रो मोडेलहरूमा केन्द्रित गर्ने रणनीति बनाएको रिपोर्टमा उल्लेख छ।
यस वर्ष सेप्टेम्बरमा हुने लन्च कार्यक्रममा आईफोन १८ प्रो, आईफोन १८ प्रो म्याक्स र फोल्डेबल आईफोन मात्र सार्वजनिक हुने अपेक्षा गरिएको छ।
रिपोर्टअनुसार एप्पलसँग हाल पाँच नयाँ मोडेल पाइपलाइनमा रहेका छन्। तीमध्ये आईफोन एयर २, मानक आईफोन १८ र तीन प्रिमियम मोडेल—आईफोन १८ प्रो, १८ प्रो म्याक्स तथा आईफोन फोल्ड समावेश छन्। यद्यपि, आईफोन एयर २ को ढुवानी तालिका भने अझै स्पष्ट छैन।
विज्ञहरूका अनुसार आईफोन एयर २ सन् २०२७ मा आईफोन १९ सिरिजसँगै लन्च हुन सक्छ र यसमा पहिलोपटक पछाडि दुईवटा क्यामेरा सेन्सर समावेश हुने सम्भावना रहेको छ।
