काठमाडौं – नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ले आफू खलनायक बनेर इतिहासको पानामा हराउन नचाहेको स्पष्ट पारेका छन्। आइतबार नयाँ पुस्ता (Gen Z) र राष्ट्रका नाममा सम्बोधन गर्दै उनले देशलाई सही दिशामा नपुर्याएसम्म विश्राम नलिने प्रतिबद्धता व्यक्त गरे।
‘यदि म धेरै अघि बिदा भएको भए, सायद देशले मलाई नायकको रूपमा मात्र सम्झिन्थ्यो होला,’ उनले भने, ‘तर म खलनायक बनेर इतिहासको पानामा हराउन चाहन्नँ। म यो देशलाई सही दिशामा नपुर्याएसम्म विश्राम लिने छैन।’
आफ्नो काम अझै नसकिएको उल्लेख गर्दै संयोजक प्रचण्डले आफू हार मान्न तयार नरहेको बताए। ‘तपाईँहरूले मलाई आज कुन रूपमा देख्नुहुन्छ, त्यो तपाईँहरूको स्वतन्त्रता हो,’ उनले भने, ‘तर मेरो अभावमा मेरो उपस्थितिको महसुस तब हुनेछ, जब तपाईँहरूले मैले कोरेका परिवर्तनहरूलाई भोग्नुहुनेछ।’
सम्बोधनका क्रममा उनले आफ्नो जीवनसंघर्ष, पारिवारिक क्षति र राजनीतिक यात्रालाई स्मरण गर्दै परिवर्तनको लडाइँ व्यक्तिगत नभई सहिदहरूको सपना पूरा गर्ने अभियान भएको बताए। भ्रष्टाचारको अन्त्य, पारदर्शिता र बलियो सरकारको आवश्यकता औँल्याउँदै उनले प्रत्यक्ष निर्वाचित कार्यकारी प्रमुखको अवधारणालाई दोहोर्याए।
प्रचण्डले नयाँ पुस्तालाई प्रश्न सोध्न, दबाब दिन र स्वतन्त्र चिन्तन गर्न आग्रह गर्दै सामाजिक सञ्जालका भ्रमबाट सचेत रहनसमेत सुझाव दिए। उनले मिलेर यस्तो नेपाल निर्माण गर्न आह्वान गरे, जहाँ युवाहरूले आफ्नो भविष्य खोज्न विदेशिनु नपरोस्।
