विराटनगर । विराटनगरको हनुमान मन्दिर अगाडि राष्ट्रिय स्वतन्त्र पार्टी (रास्वपा) का एक उम्मेदवार खगेन्द्र सुनारले गाई खाने विषयमा दिएको अभिव्यक्तिको विरोधमा प्रदर्शन गरिएको छ। हिन्दु सम्राट नेपाल, मोरङ शाखाको अगुवाइमा गरिएको उक्त प्रदर्शनमा सहभागीहरूले अभिव्यक्तिले धार्मिक भावना आहत गरेको र संविधानविरुद्ध भएको दाबी गरेका छन्।
प्रदर्शनकारीहरूले गाईलाई राष्ट्रिय जनावरको रूपमा संरक्षण गरिएको अवस्थामा यस्ता गैरजिम्मेवार अभिव्यक्ति अस्वीकार्य भएको बताएका छन्। उनीहरूले सम्बन्धित उम्मेदवारसँग सार्वजनिक रूपमा माफी माग्न र यस्ता अभिव्यक्ति नदिन चेतावनीसमेत दिएका छन्।
शान्तिपूर्ण रूपमा सम्पन्न प्रदर्शनका क्रममा नाराबाजी गरिएको थियो भने सुरक्षाका लागि प्रहरी परिचालन गरिएको थियो।
यस विषयमा केही दिनअघि भिडियो मार्फत बोल्दै सुनारले ” आफू १०/१५ वर्ष अगाडिदेखि साकाहारी भएको र जाँड, रक्सी , माछा ,मासु आदि केही पनि नखाने बताउँदै ; उक्त भिडियो केही समय अगाडिको भएको र त्यसलाई तोडमोड गरी भ्रामक पारिएको स्पष्ट पारेका थिए । शुक्रबार पार्टीको तर्फबाट विज्ञप्ती निकाल्दै सुनारलाई कानुन र समाज विपरीत कुनै पनि धारणा नराख्न चेतावनी दिइएको थियो ।
