काठमाडौं– निर्वाचन आयोगले आगामी फागुन २१ गते हुने प्रतिनिधिसभा सदस्य निर्वाचनका लागि विभिन्न जिल्ला तथा निर्वाचन क्षेत्रअनुसार मतपत्रको नमूना सार्वजनिक गरेको छ।
आयोगले सातै प्रदेशका निर्वाचन क्षेत्रका नमूना मतपत्र सार्वजनिक गरेको हो। एउटामात्र निर्वाचन क्षेत्र भएका जिल्लाका लागि एक प्रकारको र एकभन्दा बढी निर्वाचन क्षेत्र भएका जिल्लाका लागि फरक–फरक प्रकारका मतपत्रको नमूना तयार पारिएको आयोगले जनाएको छ। यी नमूना मतपत्रहरू मतदाता शिक्षाका लागि प्रयोग गरिनेछन्।
निर्वाचन आयोगका प्रवक्ता नारायणप्रसाद भट्टराईका अनुसार उम्मेदवारको सङ्ख्याका आधारमा पनि मतपत्रको आकार निर्धारण गरिएको छ। उम्मेदवार धेरै भएका निर्वाचन क्षेत्रमा तुलनात्मक रूपमा ठूलो आकारको मतपत्र छापिनेछ भने कम उम्मेदवार भएका निर्वाचन क्षेत्रमा सानो आकारको मतपत्र रहनेछ।
कर्णाली प्रदेशका सल्ल्यान, डोल्पा, मुगु, जुम्ला, कालीकोट, हुम्ला, जाजरकोट र रुकुमपश्चिम जिल्लामा एउटामात्र निर्वाचन क्षेत्र रहेको छ। यस्तै, दैलेख र सुर्खेतमा दुई–दुई वटा निर्वाचन क्षेत्र कायम छन्। ती सबै जिल्लाका मतपत्रको नमूना पनि आयोगले सार्वजनिक गरेको छ।
त्यसैगरी, सुदूरपश्चिम प्रदेशका बाजुरा, बझाङ, डोटी, दार्चुला, बैतडी र डडेलधुरा जिल्लामा एउटामात्र निर्वाचन क्षेत्र रहेको छ। अछाममा दुई, कञ्चनपुरमा तीन र कैलालीमा पाँच निर्वाचन क्षेत्र कायम रहेकाले ती सबै निर्वाचन क्षेत्रका लागि नमूना मतपत्र सार्वजनिक गरिएको आयोगले जनाएको छ।
आयोगका अनुसार समानुपातिक निर्वाचन प्रणालीतर्फका मतपत्रको छपाइ कार्य सम्पन्न भइसकेको छ।
