काठमाडौं– नायिका तथा नेतृ रेखा थापाले राजनीतिक दलहरूमाथि सार्वजनिक रूपमा प्रश्न उठाएकी छन्। उनले दलहरूलाई लक्षित गर्दै जेन–जी पुस्ताको अपेक्षा सम्बोधन गर्न सक्ने घोषणापत्र छ कि छैन भन्ने प्रश्न गरेकी हुन्।
सामाजिक सञ्जालमार्फत व्यक्त गरिएको उनको प्रश्नलाई आगामी निर्वाचनमा निर्णायक बन्दै गएको युवा मतदातासँग जोडेर हेरिएको छ।
‘के तपाईंको पार्टीसँग जेन–जीको माग पूरा गर्न सक्ने घोषणापत्र छ ?’ उनले प्रश्न गरेकी छन्, ‘यो विषयमा नेताहरूलाई डिबेटका लागि बोलाए कुन–कुन पार्टीका नेताहरू अस्वीकार गर्लान् ?’
पछिल्ला वर्षहरूमा रोजगारी, शिक्षा, प्रविधि, सुशासन र जलवायु परिवर्तनजस्ता विषयमा जेन–जी पुस्ताको चासो बढ्दै गएको सन्दर्भमा दलहरूको तयारी कति छ भन्ने प्रश्न पनि उनले उठाएकी छन्।
यसअघि चुनावी मुद्दामा सार्वजनिक बहसका लागि गरिएको आह्वान राष्ट्रिय स्वतन्त्र पार्टीका वरिष्ठ नेता बालेन्द्र साहले अस्वीकार गरेका थिए भने नेकपा (एमाले) का अध्यक्ष केपी शर्मा ओली र नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ बहसमा सहभागी हुन तयार भएका थिए।
तर रेखा थापाले भने जेन–जी केन्द्रित घोषणापत्र र नीतिगत दृष्टिकोणबारे खुला डिबेटका लागि प्रमुख दलका नेताहरूलाई चुनौती दिएकी हुन्। उनले यस्तो बहसमा सबै नेताहरू सहभागी नहुन सक्ने अड्कलसमेत गरेकी छन्।
राजनीतिक विश्लेषकहरूका अनुसार युवाका मुद्दामा स्पष्ट योजना र ठोस नीति नभएका केही दलका नेताहरू सार्वजनिक बहसबाट टाढा रहने सम्भावना रहन्छ। विशेषगरी डिजिटल अर्थतन्त्र, रोजगारी सिर्जना, पारदर्शिता र उत्तरदायित्वका विषयमा स्पष्ट प्रतिबद्धता प्रस्तुत गर्न कठिनाइ हुने दलहरू डिबेटमा सहभागी नहुन सक्ने बताइन्छ।
यद्यपि, युवामैत्री नीति र पुस्तागत परिवर्तनको एजेन्डा अघि सार्दै आएका केही दल र नेताहरूले भने यस्तो डिबेटलाई अवसरका रूपमा लिने संकेत देखिएको छ।
रेखा थापाको प्रश्नले दलहरूको चुनावी घोषणापत्र व्यवहारिक छन् कि औपचारिक दस्तावेज मात्र भन्ने बहसलाई पुनः सतहमा ल्याएको राजनीतिक वृत्तमा चर्चा छ। आगामी दिनमा दलहरूले जेन–जीका मुद्दामा कस्तो स्पष्टता र प्रतिबद्धता प्रस्तुत गर्छन् भन्नेमा राजनीतिक चासो बढ्दै गएको छ।
