न्यूयोर्क । अमेरिकी बहुराष्ट्रिय प्रविधि कम्पनी अमेजनले गत अक्टोबरमा घोषणा गरिएको पुनर्संरचना योजनाअन्तर्गत विश्वव्यापी रूपमा थप १६ हजार रोजगारी कटौती गर्ने जनाएको छ। कम्पनीले बुधबार यसबारे जानकारी दिएको हो।
यसअघि नै १४ हजार पद कटौती गर्ने योजना सार्वजनिक गरिसकेको विशाल ई–कमर्स कम्पनी अमेजनले अब थप १६ हजार पद समायोजन गर्ने बताएको हो।
कम्पनीकी वरिष्ठ उपाध्यक्ष बेथ गालेट्टीले जारी गरेको विज्ञप्तिमा पद समायोजनसम्बन्धी आगामी योजनाबारे जानकारी दिँदै रोजगारी कटौतीको उद्देश्य “तहहरू घटाउने, स्वामित्व बढाउने र कर्मचारीतन्त्र हटाउने” रहेको बताएकी छन्।
अक्टोबरमा सार्वजनिक मिडिया रिपोर्टअनुसार कुल करिब ३० हजार रोजगारी कटौती अमेजनका करिब ३ लाख ५० हजार कार्यालय–आधारित कर्मचारीको १० प्रतिशतभन्दा बढी हो।
योजनाअनुसार वितरण केन्द्र तथा गोदाममा कार्यरत कामदारहरूलाई असर नपर्ने र कार्यालयमा काम गर्ने जनशक्ति घटाइने जनाइएको छ। वितरण तथा गोदाम क्षेत्रमा कार्यरत करिब १५ लाख कर्मचारीहरूलाई भने यो योजनाले कुनै प्रभाव नपार्ने बताइएको छ।
कम्पनीले जनशक्ति कटौतीसम्बन्धी मिडिया रिपोर्टहरूमा औपचारिक टिप्पणी गर्न अस्वीकार गरेको छ। अमेजनको यो कदम कृत्रिम बुद्धिमत्ता (एआई) क्षेत्रमा बढ्दो लगानीको बीचमा आएको हो।
यद्यपि, अमेजनले बुधबार घोषणा गरिएको पछिल्लो रोजगारी कटौतीबारे औपचारिक पुष्टि भने गरेको छैन। कम्पनीले आफ्नो पूर्ण वर्ष सन् २०२५ को योजना फेब्रुअरी ६ मा पत्रकार सम्मेलनमार्फत सार्वजनिक गर्ने जनाएको छ।
