काठमाडौं, माघ १२ — आईसीसी महिला टी–२० विश्वकप ग्लोबल छनोटअन्तर्गत समूह चरणको आफ्नो अन्तिम खेलमा नेपालले आज स्कटल्यान्डसँग प्रतिस्पर्धा गर्दैछ।
नेपाल र स्कटल्यान्डबीचको खेल कीर्तिपुरस्थित त्रिवि क्रिकेट मैदानमा बिहान ९ बजेदेखि सुरु हुनेछ। नेपाली टोलीको कप्तानी इन्दु बर्माले सम्हालिरहेकी छन् भने स्कटल्यान्डको कप्तान क्याथरिन ब्राइस हुन्।
आईसीसी महिला टी–२०आई वरियतामा स्कटल्यान्ड ११औँ स्थानमा रहँदा नेपाल २१औँ स्थानमा छ। वरियतामा कमजोर देखिए पनि नेपालका लागि यो खेल ‘गर या मर’ को अवस्थामा रहेको छ। सुपर सिक्समा प्रवेश गर्न नेपालले स्कटल्यान्डलाई जित्नैपर्ने दबाबमा छ।
नेपाल यसअघि थाइल्यान्ड र नेदरल्यान्ड्ससँग पराजित भएको थियो भने तेस्रो खेलमा जिम्बाबेलाई पराजित गर्दै प्रतियोगितामा पहिलो जित निकालेको थियो। सुपर सिक्समा पुग्न नेपालले स्कटल्यान्डलाई कति अन्तरले पराजित गर्छ भन्नेमा पनि भर पर्नेछ। साथै, त्यसपछि हुने थाइल्यान्ड र नेदरल्यान्ड्सबीचको खेलको नतिजा पनि नेपालका लागि निर्णायक बन्नेछ।
स्कटल्यान्डले यसअघि एकपटक महिला टी–२० विश्वकप खेलेको अनुभव छ। यूएईमा सम्पन्न महिला टी–२० विश्वकप २०२४ मा सहभागिता जनाए पनि स्कटल्यान्ड समूह चरणबाटै बाहिरिएको थियो। सोही विश्वकपको प्रदर्शनका आधारमा स्कटल्यान्ड सोझै ग्लोबल छनोटमा पुगेको हो।
नेपाल र स्कटल्यान्डबीच अहिलेसम्म टी–२०आई खेल भएको छैन। यद्यपि, प्रतियोगिताअघि भएको अभ्यास खेलमा नेपाल २७ रनले पराजित भएको थियो।
