झापा । नेपाली कांग्रेसका महामन्त्री विश्वप्रकाश शर्माले कांग्रेसलाई नयाँ रूप दिनु अपरिहार्य रहेको बताउँदै परिवर्तनशील नेताले मात्र नेतृत्व गर्ने र पुरानै ढर्रामा अड्किनेलाई स्वतः विदा लिनुपर्ने धारणा राखेका छन्।
झापा निर्वाचन क्षेत्र नं. १, क्षेत्रीय समितिले धुलाबारीमा आयोजना गरेको ‘अबको राजनीति र अबको नेपाल’ अन्तरक्रियामा उनले हालको समय र परिस्थितिले रूपान्तरणको माग गरिरहेको बताए। उनका अनुसार, सिंहदरबारदेखि गाउँको चिया पसलसम्म सबै तहमा परिवर्तन आवश्यक छ।
महामन्त्री शर्माले भने, “समय बदलिएको छ, त्यसैले नेता, कर्मचारी संयन्त्रदेखि आम नागरिकसम्म सबै बदलिनुपर्छ। जसले बदलिन सक्दैनन्, उनीहरू नेतृत्वमा रहन सक्दैनन्।”
हालैको ‘जेनजी’ आन्दोलनलाई स्मरण गर्दै उनले यसले देशमा लोकतान्त्रिक चेतना बलियो बनाएको र भ्रष्टाचारविरुद्ध कठोर कदम चाल्नुपर्ने सन्देश दिएको बताए। नेतृत्वमा नयाँ पुस्ताको माग बढेको उनले जोड दिए।
प्रदर्शनका क्रममा सुरुवाती दिन गोली चलाउने आदेश दिने र भोलिपल्ट भएको तोडफोड–आगजनीमा संलग्नहरूबारे गम्भीर छानबिन गर्नुपर्ने उनले माग गरे। दोषी जो भए पनि उनीहरूमाथि मोलाहिजा नगरी कानुनी कारबाही हुनुपर्नेमा उनले जोड दिए।
