विराटनगर । मोरङको रंगेली नगरपालिकास्थित नगर अस्पताल देशभरमै उत्कृष्ट र नमूना अस्पताल बन्न सफल भएको छ ।
न्यूतम सेवा मापदण्डको विभिन्न सूचकअनुसार गरिएको मूल्यांकनमा स्थानीयतह मातहत रहेका देशभरका अस्पतालहरूमध्ये रंगेली नगर अस्पताल उत्कृष्ट र नमूना अस्पताल बन्न सफल भएको हो ।
रंगेली बजारनजिकै रहेर सुनवर्षी, रतुवामाई, कानेपोखरी, धनपालथान र भारतको सीमावर्ती गाउँका नागरिकहरूलाई उपचार सेवा दिँदै आएको यो अस्पतालले सुशासन र व्यवस्थापन, क्लिनिकल म्यानेजमेन्ट र हस्पिटल सेवा सर्भिस एमएसएसको सूचकअनुसार भएको मूल्यांकनमा ८६ प्रतिशत अंक प्राप्त गरेको छ ।
स्थानीयतहहरू मातहत रहेका देशभरका अस्पतालहरूमा यो अस्पतालले ८६ प्रतिशत अंक प्राप्त गरेको हो । विभिन्न सूचकको मूल्यांकनका आधारमा अस्पतालले उक्त अंक प्राप्त गरेको हो ।
उक्त मूल्यांकन प्रत्येक ६-६ महिनामा हुने गरेको छ । ६ महिनापछि नगरपालिकाले अस्पताललाई थप सुधार गरेपछि अंक बढाउन सफल भएको हो । अब अझै सुधार हुँदै गएपछि रंगेली अस्पतालले प्राप्त गर्ने अंक बढ्दै जानेछ ।
रंगेली नगरपालिका प्रमुख दिलिप बगडियाले सबैको प्रयासबाट अस्पताल नमूना र उदाहरणीय बन्न सफल भएको बताए ।
अझ व्यवस्थित, सुविधा सम्पन्न बनाउन अस्पताल व्यवस्थापन समितिको निरन्तरको प्रयास, चिकित्सक, स्वास्थ्यकर्मी र कर्मचारीको महत्वपूर्ण भूमिका रहने उनको भनाइ छ ।
अस्पतालले प्रसूति सेवा, डायलसिस, एक्स–रे, प्रयोगशाला सेवालगायत सुविधा थप गर्दै गइरहेको छ ।
कोशी अस्पतालभन्दा पुरानो इतिहास बोकेको रंगेली नगर अस्पतालले ‘ओपन स्पेस’सहितको बहिरंग सेवाका साथै, स्त्री तथा प्रसूति रोग विशेषज्ञ सेवा, २४सै घण्टा फिजिसियन, सर्जरी, बालरोग विशेषज्ञ सेवा, भिडियो एक्सरे सेवा दिइरहेको छ ।
रंगेलीका दलित र विपन्न वर्ग, अपांगता भएका व्यक्ति, ज्येष्ठ नागरिक र महिला स्वास्थ्य स्वयमसेविका लगायत लक्षित समूहलाई समेट्नेगरी कार्यविधि बनाएर नगरले स्वास्थ्य बिमा लागू गरेको छ, जसअन्तर्गत नगप्रमुख अग्रवालले ७० लाख रुपैयाँ खर्चिएर नगरभित्रका नौवटै वडाका १८ सय ६८ परिवारको बिमा गरिदिएका छन् ।
त्यसरी बिमा गरेका व्यक्तिहरूले रंगेली नगरअस्पताललाई पहिलो प्राथमिकता राखेका छन् ।
नगरप्रमुख बगडियाले दोस्रो कार्यकालको तीन वर्षसम्ममा स्वास्थ्यलाई पहिलो प्राथमिकतामा राखेर काम गरिहँदा नगर अस्पताल छलाङ मार्न सफल भएको छ । उनको नेतृत्वमा रहेको नगरले स्वास्थ्य क्षेत्रलाई प्राथमिकतामा राखी गरिएको लगानी र सुधारबाट स्थानीय लाभान्वित बनेका छन् ।
