विराटनगर । कोशी प्रदेश खेलकुद विकास बोर्डका सदस्य सचिव कृष्ण बस्नेत (पर्शुराम) ले खेलक्षेत्रको बजेट घटाएको भन्दै सामाजिक विकास मन्त्री तथा बोर्डका अध्यक्ष पाँचकर्ण राईप्रति आक्रोश व्यक्त गरेका छन् ।
बिहीबार बसेको बोर्डको २९औँ बैठकमा खेलक्षेत्रको बजेट घटाएको भन्दै सदस्यसचिव बस्नेतले राईप्रति चर्को असन्तुष्टि र आक्रोश व्यक्त गरेका हुन् ।
मन्त्रालयले लय समातिरहेको प्रदेशको खेलकुद क्षेत्रको लय बिथोल्ने गरि बजेट निर्माण गरेको भन्दै सदस्य सचिव बस्नेतले आक्रोश व्यक्त गरेका थिए ।
बस्नेतले खेलकुद विकास बोर्डले खेलाडीहरू खेलेरै जीवनयापन गर्न सक्ने अवस्था निर्माण गर्ने गरि काम गरिरहेको बेला मन्त्रालयले बोर्डको लक्ष्यलाई धक्का पुग्ने काम गरेको धारणा व्यक्त गरे ।
उनले मन्त्रालयको बजेट बढेको अवस्थामा समेत खेलक्षेत्रलाई उपेक्षा गरेर बजेट विनियोजन गरेको भन्दै मन्त्रालयको कदमको बोर्डका सम्पूर्ण सदस्य र खेलक्षेत्रले नै प्रतिवाद गर्ने बताए ।
बैठकमा बोल्ने अधिकांश बोर्ड सदस्यहरूले मन्त्रालयले खेलक्षेत्रलाई नजरअन्दाज गर्ने किसिमको बजेटको विरोध गरे ।
बैठकले कोशी प्रदेशको प्रतिनिधित्व गर्दै १५ औँ राष्ट्रपति रनिङ शिल्ड प्रतियोगितामा पदक प्राप्त गर्ने खेलाडीलाई असार २२ गते विराटनगरमा सम्मान गर्ने निर्णय गरेको बोर्डका कार्यालय प्रमुख कालिदास भट्टराईले जानकारी दिए ।
उनले बोर्डले खेलाडीसाथै खेल क्षेत्रमा लामो समय सम्म योगदान गर्ने अग्रज खेलकर्मीलाई सम्मान गर्ने निर्णय गरेको बताए ।
त्यस्तै, बैठकले १५ औँ राष्ट्रपति रनिङ शिल्ड प्रदेशस्तरीय छनोट प्रतियोगिता सहभागी नभएका सुनसरी, खोटाङ र सोलुखुम्बुलाई के कति कारणले सहभागी हुन नसकेको भन्दै स्पष्टीकरण सोध्ने निर्णयसमेत गरेको छ ।
