एजेन्सी । जापानमा एक ट्याक्सी चालकले करिब ५० महिलालाई बलात्कार गरेको हुन सक्ने आशंका गरिएको छ ।
जापानी प्रहरीले बिहीबार एक महिला यात्रुलाई लागु औषध खुवाएर बलात्कार गरेको आशंकामा एक पूर्वट्याक्सी चालकलाई पक्राउ गरेको बताएका छन् ।
मिडिया रिपोर्टहरूले दर्जनौँ थप पीडित हुन सक्ने बताएका छन् ।
प्रहरीले उनको ट्याक्सी वा उनको घरमा करिब ५० जना महिलालाई यौन दुर्व्यवहार गरेको करिब तीन हजार भिडियो र तस्बिर फेला पारेको योमियुरी सिम्बुन दैनिक र जिजी प्रेसले रिपोर्ट गरेका छन् ।
“गत वर्ष ती व्यक्तिले २० वर्षकी एउटी महिलालाई निद्राको गोली खान लगाए, जसले गर्दा उनी बेहोस भइन्, उनलाई आफ्नो घरमा लिएर गए र अभद्र कार्य गरे, जसलाई उनले फिल्म बनाएका थिए”, टोकियो प्रहरीका प्रवक्ताले भने ।
प्रहरीले बुधबार ५४ वर्षीय ती व्यक्तिलाई ‘सहमतिविहीन यौन सम्पर्क र यौन अंगको छायांकनको सजायसम्बन्धी कानुनको उल्लंघन’ को आशंकामा पक्राउ गरेको थप विवरण नदिई प्रवक्ताले बताए ।
मिडिया रिपोर्टहरूका अनुसार उनको कपालमा निद्राको चक्कीका निशानहरू फेला परेका थिए । रिपोर्टहरूका अनुसार ती व्यक्तिको फोन र अन्य उपकरणहरूमा बरामद गरिएका फुटेजहरू सन् २००८ देखिका थिए ।
ती व्यक्तिलाई गत अक्टोबरमा अर्की महिलालाई लागु औषध खुवाएर उनको ४० हजार येन (दुई सय ८० डलर) लुटेको आशंकामा पक्राउ गरिएको पनि मिडियाले बताएका छन् ।
कथित अभद्र आक्रमणको आरोपमा डिसेम्बरमा फेरि हिरासतमा लिनुअघि उनलाई पछि रिहा गरिएको थियो ।
