काठमाडौं । भारतले साफ यु-१९ च्याम्पियनसिपको उपाधि जितेको छ ।
साबिक विजेता बंगलादेशलाई पेनाल्टी सुटआउटमा ४-३ ले पराजित गर्दै घरेलु टोली भारतले उपाधि जितेको हो ।
अरुणाञ्चलको गोल्डेन जुब्ली रंगशालामा सम्पन्न फाइनलको निर्धारित समयमा दुवै टोलीबाट १-१ गोल भएपछि खेलको निर्णय पेनाल्टी सुटआउटबाट लिएको हो ।
खेलको दोस्रो मिनेटमै भारतले सिंगमयुम शामीको गोलमार्फत अग्रता लिएको थियो । ६१औं मिनेटमा जोय अहमदले बंगलादेशका लागि बराबरी गोल फर्काए ।
सेमिफाइनलमा भारतले माल्दिभ्सलाई ३-० तथा बंगलादेशले नेपाललाई २-१ ले पराजित गरेका थिए ।
भारतले चौथौ पटक उमेर समूहको उपाधि जितेको हो । यो प्रतियोगिता साफ यु-१८, १९ र २० च्याम्पियनसिपको नाममा हुँदै आएको छ ।
भारतले यसअघि सन् २०१९ मा यु-१८, २०२२ मा यु-२० र २०२३ मा यु-१९ काे नामले आयोजित च्याम्पियनसिपको उपाधि जितेको थियो ।
