विराटनगर । कोशी प्रदेशको राजधानी विराटनगरमा जारी तेस्रो संस्करणको मनमोहन स्मृति एकदिवसीय क्रिकेट प्रतियोगितामा आयोजक टिम कोशी प्रदेश पराजित भएको छ ।
पूर्वप्रधानमन्त्री मनमोहन अधिकारीको स्मृतिमा विराटनगरको वैजनाथपुरस्थित गिरिजाप्रसाद कोइराला अन्तर्राष्ट्रिय क्रिकेट रंगशालामा बुधबार भएको समूह ‘बी’ अन्तर्गतको दोस्रो लिग खेलमा कोशीले पराजय बेहोरेको हो ।
पाहुना टोली भारतको आसाम क्रिकेट क्लबसँग आयोजक कोशी प्रदेश ९७ रनले पराजित भएसँगै फाइनलमा पुग्ने सम्भावनालाई कमजोर बनाएको छ ।
मंगलबार विभागीय टोली पुलिसलाई ३७ रनले स्तब्ध पार्दै पहिलो पटक जित निकालेको कोशीले आसामसँग लज्जास्पद पराजय बेहोरेको हो ।
आसामले १ खेलमा १ मा जित हात पार्दै २ अंक बटुलेको छ भने कोशीसँग पनि २ खेलमा १ मा जित र १ मा पराजित हुँदै २ अंक नै रहेको छ ।
नेट रन रेटमा कोशी आसामभन्दा पछि परेको छ ।
आसामले अब बिहीबार पुलिसँग प्रतिस्पर्धा गर्ने छ । पुलिसले आसामलाई फराकिलो अन्तरले पराजित गरेमात्र तीनै टिमको सम्भावना नेट रन रेटले तय गर्ने छ ।
टस जितेर ब्याटिङ गरेको आसामले निर्धारित ५० ओभरको खेलमा ४७ दशमलव ३ बलमा सवै विकेट गुमाई २ सय ९ रनको सम्मानजनक स्कोर बनाएको थियो ।
आसामका प्लेयर अफ द म्याच कप्तान गोकुल शर्माले ९९ बलमा २ छक्का र ७ चौका प्रहार गर्दै ७८ रन बनाउँदा अरुण सोनारले ५१ रन, केभिन सन्जिव क्रिस्टोफरले १५ रन र अमित सिंहाले १२ रनको योगदान दिए ।
कोशी प्रेम कामतले १० ओभरमा ३ मेडन राख्दै ४ विकेट लिँदा विपिनकुमार महतो र भुपाल लुइटेलले २–२ विकेट लिए ।
जवाफमा २ सय १० रनको लक्ष्य पाएको कोशीले ३७ दशमलव २ बलमा सवै विकेट १ सय १२ रनमा सिमित भयो ।
कोशीका पुछारका ब्याटर विपिनकुमार महतोले १५ रन बनाउँदा यस भट्टराई पनि १५ रन जोडे ।
त्यस्तै ओपनर ब्याटरले चिराग कबहले ११ रन बाहेक अन्य ब्याटरले दोहोरो अंकलाई छुन सकेनन् ।
आसामका टपनकुमार शर्माले ३ विकेट लिँदा कप्तान गोकसल शर्मा पनि ३ विकेट दिए ।
