विराटनगर । स्वास्थ्य कार्यालय ओखलढुंगा, रुम्जाटारका कार्यालय प्रमुख अहमद मन्सुरीले आफ्नो निजी मेडिकलमा नेपाल सरकारमार्फत निःशुल्क वितरण हुने औषधि बिक्री गरिएको तथ्य फेला परेको छ ।
प्रमुख मन्सुरीको मेडिकलमा नेपाल सरकारबाट निःशुल्क प्राप्त हुने विभिन्न प्रकारका औषधि बिक्रीका लागि राखिएको पाइएको हो ।
जिल्ला प्रशासन कार्यालय ओखलढुङ्गा र औषधी व्यवस्था विभाग विराटनगरले गरेको संयुक्त अनुगमनमा सिद्धिचरण नगरपालिका–४ रुम्जाटारमा रहेको मन्सुरीको पदमा मेडिकल हलमा नेपाल सरकारबाट निःशुल्क प्राप्त हुने औषधि फेला परेको थियो ।
अनुगमनपश्चात् टोलीले उक्त मेडिकल हल सिल गरेको छ ।
नेपाल सरकारबाट निःशुल्क प्राप्त हुने औषधि बिक्रीका लागि राखिएको पाइएकाले पदमा मेडिकल हल सिल गरिएको ओखलढुंगाकी सहायक प्रमुख जिल्ला अधिकारी गोमादेवी ढकाल (पौडेल)ले बताइन् ।
प्रमुख मन्सुरीले जिल्ला स्वास्थ्य कार्यालयबाट सरकारी औषधि लगेर आफ्नो निजी मेडिकल हलमार्फत विक्री गरेको हुन सक्ने स्थानीयले आशंका गरेका छन् ।
यसअघि पनि प्रमुख मन्सुरीलाई जिल्ला अस्पताल र स्वास्थ्य कार्यालयको सामाग्री दुरुपयोग गरेको आरोप लागेको थियो ।
यस विषयमा प्रमुख मन्सुरीले आफूलाई जानकारी नभएको प्रतिक्रिया दिएका छन् ।
कामको सिलसिलामा अहिले फिल्डमा रहेकोले अनुगमन र सिल गरिएको बारेमा आफूलाई जानकारी नभएको प्रमुख मन्सुरीले बताए ।
