धनपालथान । मोरङको धनपालथान गाउँपालिकामा आयुर्वेदिक उपचार र परामर्श दिने उद्देश्यका साथ नागरिक आरोग्य सेवा केन्द्र सञ्चालनमा आएको छ ।
जिल्ला आयुर्वेद स्वास्थ्य केन्द्र मोरङले धनपालथान–४ सोराभागमा आइतबारदेखि नागरिक आरोग्य सेवा केन्द्र सञ्चालनमा ल्याएको हो ।
धनपालथान गाउँपालिकासँगको समन्वयमा सञ्चालनमा आएको उक्त सेवा केन्द्रको कोशी प्रदेशको स्वास्थ्य मन्त्रालयकी सचिव डाक्टर राधिका थपलिया र गाउँपालिका प्रमुख जिबछप्रसाद गच्छदारलगायतले उद्घाटन गरे ।
गाउँपालिकाको प्रशासनिक भवननजिकै रहेको नागरिक आरोग्य सेवा केन्द्रले प्राचीन आयुर्वेद चिकित्सा पद्धतिमार्फत स्वस्थ समाज निर्माण गर्ने अभियान थाल्ने जिल्ला आयुर्वेद स्वास्थ्य केन्द्र, मोरङका वरिष्ठ कविराज निरीक्षक बैजनाथ साहले जानकारी दिए ।
उद्घाटन कार्यक्रममा बोल्दै गाउँपालिका अध्यक्ष गच्छदारले नागरिकलाई आफ्नो स्वास्थ्यप्रति सचेत र जिम्मेवार बनाउन आरोग्यको केन्द्रको थालनी गरेको र यसलाई सफल रूपमा सञ्चालन गर्न सबैको साथ जरुरी रहेको बताए ।
यसैगरी, स्वास्थ्य मन्त्रालयकी सचिव थपलियाले नसर्ने रोगमा आयुर्वेदको विषेश भूमिका हुने बताउँदै नागरिक आरोग्य सेवा केन्द्रको थालनी भएको सुनाइन् ।
आफ्नो स्वास्थ्यको प्रथम जिम्मेवार आफैं हो भन्ने कुराको बोध नागरिक आफैंले गर्नुपर्ने बताउँदै उनले ‘मेरो स्वास्थ्य मेरो जिम्मेवारी’ भन्ने नारालाई सार्थक पार्न सुरु भएको नागरिक आरोग्य कार्यक्रम स्वस्थ समाज निर्माणतर्फ उन्मुख भएको बताइन् ।
स्वस्थ मानिसलाई रोग लाग्नै नदिने र रोग लागेका व्यक्तिलाई आयुर्वेद तथा योगको माध्यमबाट निरोगी बनाउने प्रयासका साथ यस सेवा केन्द्रको स्थापना भएको आयुर्वेद स्वास्थ्य केन्द्र मोरङका प्रमुख रामप्रवोध चौधरीले जानकारी दिए ।
उनका अनुसार जिल्ला आयुर्वेद सेवा केन्द्र मोरङ मातहतको यो सातौं आरोग्य सेवा केन्द्र हो । यसअघि लेटाङ, मिक्लाजुङ, कानेपोखरी, रंगेली, जहदा र सुन्दरहरैंचामा आरोग्य सेवा केन्द्र सञ्चालनमा छन् ।
नागरिक आरोग्य केन्द्रबाट दम, हड्डी खिइने रोग, हाडजोर्नी तथा नसासम्बन्धी रोग, बाथ, पेटसम्बन्धी समस्या, महिलासम्बन्धी स्वास्थ्य समस्या, पिसाबसम्बन्धी समस्या लिएर आउने बिरामीलाई विशेष सेवा दिइने प्रमुख चौधरीको भनाइ छ ।
धनपालथानमा नागरिक आरोग्य सेवा केन्द्र सुरु गरेको अवसर पारेर निःशुल्क आयुर्वेद तथा वैकल्पिक चिकित्सा शिविर पनि सञ्चालन गरिएको थियो ।
जसबाट १५५ जना जना लाभान्वित भएको जिल्ला आयुर्वेद स्वास्थ्य केन्द्र, मोरङका वरिष्ठ कविराज निरीक्षक बैजनाथ साहले जानकारी दिए ।
