गछिया । मोरङको सुन्दरहरैंचा नगरपालिका–३ गछियामा सोमबारदेखि नागरिक आरोग्य सेवा केन्द्र सञ्चालनमा आएको छ । जिल्ला आयुर्वेद स्वास्थ्य केन्द्र मोरङले सुन्दरहरैंचा नगरपालिकासँगको समन्वयमा नागरिक आरोग्य सेवा केन्द्र सञ्चालनमा ल्याएको हो ।
गछियास्थित लक्ष्मीनारायण मन्दिर परिसरमा जिल्ला समन्वय समितिका अध्यक्ष अजम्बर राई, सुन्दरहरैंचा नगरप्रमुख केदार गुरागाईंलगायतले आरोग्य सेवा केन्द्रको उद्घाटन गरेका थिए । उद्घाटन कार्यक्रममा बोल्दै समन्वय समितिका प्रमुख राईले मन्दिर परिसरमा भजनकीर्तन गरिरहने जेष्ठ नागरिकसहित समस्त सुन्दरहरैंचाबासीलाई लक्षित गरेर आरोग्य केन्द्र सञ्चालनमा ल्याइएको बताए ।
यस्तै, नगरप्रमुख गुरागाईंले हाल मन्दिरले निःशुल्क रूपमा उपलब्ध गराएको भवनमा राखेर आरोग्य केन्द्र सञ्चालनमा ल्याइएको बताउँदै चाँडै नै आरोग्य केन्द्रका लागि भवन बनाएर सारिने प्रतिबद्धता जनाए । स्वस्थ मानिसलाई रोग लाग्नै नदिनेगरी र रोग लागेका व्यक्तिलाई आयुर्वेद तथा योगको माध्यमबाट निरोगी बनाउने प्रयत्नका साथ यस सेवा केन्द्रको स्थापना भएको गुरागाईंले बताए ।
‘मेरो स्वास्थ्य मेरो जिम्मेवारी’ भन्ने नारासहित जिल्ला आयुर्वेद सेवा केन्द्र मोरङ मातहतको यो छैटौं आरोग्य सेवा केन्द्र हो । लेटाङ, मिक्लाजुङ, कानेपोखरी, रंगेली र जहदामा आरोग्य सेवा केन्द्र सञ्चालनमै छन् भने धनपालथानमा पनि सातौं आरोग्य सेवा केन्द्र स्थापना गर्ने तरखर रहेको जिल्ला आयुर्वेद सेवा केन्द्र मोरङका प्रमुख रामप्रवोध चौधरीले जानकारी दिए ।
नागरिक आरोग्य केन्द्रबाट दम, हड्डी खिइने रोग, हाडजोर्नी तथा नसासम्बन्धी रोग, बाथ, पेटसम्बन्धी समस्या, महिलासम्बन्धी स्वास्थ्य समस्या, पिसाबसम्बन्धी समस्या लिएर आउने बिरामी विशेष सेवा दिइने प्रमुख चौधरीको भनाइ छ ।
सुन्दरहरैंचामा नागरिक आरोग्य सेवा केन्द्र सुरु गरेको अवसर पारेर निःशुल्क आयुर्वेद स्वास्थ्य शिविर र होमोपेथिक शिविर सञ्चालन गरिएको थियो । जसबाट १५५ जना जना लाभान्वित भएको जिल्ला आयुर्वेद सेवा केन्द्र मोरङका वरिष्ठ कविराज निरीक्षक बैजनाथ साहले जानकारी दिए ।
यस नगरपालिकाबाट सरदर महिनामा १५०० जना उपचारका लागि विराटनगरस्थित जिल्ला आयुर्वेद सेवा केन्द्र पुग्नेगरेको वरिष्ठ कविराज निरीक्षक साहको भनाइ छ ।
