विराटनगर । पूर्वी नेपालको पहिलो आँखा अस्पतालको रूपमा रहेको विराटनगरको रामलाल गोल्छा आँखा अस्पताल दृष्टि सेवामा समर्पित संस्था बन्दै गएको छ ।
विराटनगर महानगरपालिका–७ मा अवस्थित अस्पतालले पछिल्लो समय विभिन्न स्थानीय तहरूसँगको सहकार्य र समन्वयमा निःशुल्क आँखा शिविर सञ्चालन गर्दै आएको छ ।
तिलगंगा आँखा प्रतिष्ठान काठमाडौंको व्यवस्थापनमा सञ्चालित उक्त अस्पतालले गएको सातामात्र विराटनगर–१४ नयाँ टोलमा निःशुल्क आँखा शिविर चलाएको थियो, जसमा करिब दुई सय जना लाभान्वित भएका थिए ।
बर्सेनि रूपमा यसरी शिविर आउँदा आफूहरूले आँखा जँचाउन अस्पताल नै जानु नपरेको भन्दै शिविरमा आएका स्थानीय सुखानुलाल महतोले खुशी व्यक्त गरे ।
१४ नम्बर वडा कार्यालयसँगको सहकार्यमा सञ्चालित शिविरमा १६८ जनाले ओपिडी सेवा लिएका थिए भने २८ जनालाई मोतिबिन्दुको शल्यक्रियाका लागि अस्पताल रिफर गरिएको दृष्टि विशेषज्ञ रुचिका साहले जानकारी दिइन् ।
जाँच गरिएकामध्ये धेरैमा मोतिबिन्दुको समस्या देखा परेको जनाउँदै उनले गर्मीयाम भएका कारण बालबालिकाहरूमा भने एलर्जीका समस्या देखिएको बताइन् ।
अत्याधुनिक प्रविधिसहित उच्च गुणस्तरीय र सर्वसुलभ सेवा दिने गरेको रामलाल गोल्छा आँखा अस्पतालले आयोजना गरेको निःशुल्क शिविरमा मोतियाबिन्दु भएका बिरामीलाई अस्पतालमा ल्याई निःशुल्क शल्यक्रिया गरिने जनाइएको छ ।
विपन्न समुदायको बसोबास रहेको उक्त वडामा दैनिक ज्यालादारी गरी गुजारा गर्नेहरूका लागि यस्तो शिविर जरुरी रहेको वडाध्यक्ष सूर्यनारायण महतोले जानकारी दिए ।
२०३९ सालमा स्थापित रामलाल गोल्छा आँखा अस्पतालले कोशी प्रदेशका विभिन्न क्षेत्रमा निःशुल्क आँखा शिविर सञ्चालन गरी हजारौंलाई उच्चस्तरीय आँखा स्वास्थ्य सेवा प्रदान गरिरहेको छ ।
यस अस्पतालले विशेषगरी ग्रामीण क्षेत्रका बासिन्दालाई लक्षित गरी विगत केही वर्षदेखि निःशुल्क आँखा परीक्षण, चश्मा वितरण र मोतिबिन्दु शल्यक्रिया जस्ता सेवाहरू प्रदान गर्दै आएको छ ।
अस्पतालमा वार्षिक रूपमा करिब ७ हजारको शल्यक्रिया, करिब ७० हजारको जाँच हुने गरेको छ ।
अस्पतालले विभिन्न स्थानीय तहहरूमा सामुदायिक आँखा उपचार केन्द्र सञ्चालन गरिरहेको छ ।
बुधबारमात्र बराहक्षेत्र नगरअस्पतालसँगको सहकार्यमा रामलाल गोल्छा आँखा अस्पतालले आँखा उपचार केन्द्रको थालनी गरेको छ ।
