विराटनगर । विराटनगरस्थित रामलाल गोल्छा आँखा अस्पतालसँगको सहकार्यमा सुनसरीको बराहक्षेत्र नगरपालिकाले आँखा उपचार केन्द्रको थालनी गरेको छ ।
पूर्वमन्त्री तथा प्रतिनिधिसभा सदस्य ज्ञानेन्द्रबहादुर कार्कीले बुधबार उद्घाटन गरेसँगै बराहक्षेत्र नगर अस्पतालमा आँखा उपचार केन्द्र सुरु भएको हो ।
तिलगंगा आँखा प्रतिष्ठान काठमाडौँको व्यवस्थामा सञ्चालित रामलाल गोल्छा आँखा अस्पताल प्रतिष्ठानसँगको सहकार्यमा आँखा उपचार केन्द्र सञ्चालनमा आएको हो ।
नगर प्रमुख एवम् नगर अस्पताल व्यवस्थापन समितिकाका अध्यक्ष रमेश कार्कीको सभाध्यक्षतामा उक्त उद्घाटन कार्यक्रम आयोजना भएको थियो ।
नगरपालिकाले सञ्चालन गरिरहेको उक्त अस्पतालमा सेवाग्राहीहरूको माग र आवश्यकतालाई मध्यनजर गरेर आँखाको उपचार सेवा विस्तार गरिएको नगर प्रमुख तथा नगर अस्पताल व्यवस्थापन समितिका अध्यक्ष रमेश कार्कीले बताए ।
भौतिक संरचना निर्माण र जनशक्तिसँगै सेवाहरू बढाउँदै लगिएको नगर प्रमुख कार्कीको भनाइ छ ।
अस्पतालको प्रशासन र व्यवस्थापन सबलपछि भौतिक संरचना (भवन) र जनशक्ति ( चिकित्सक, स्वास्थ्यकर्मी ) समेत बढाइएको छ ।
हाल अस्पतालमा दैनिक २ सय ७५ देखि ३ सय २५ को सङ्ख्यामा सेवाग्राहीहरू आउने गरेका छन् ।
हाल अस्पतालले वर्षको ३६५ दिनै बिहान ७ बजे देखि बेलुकी ७ बजे सम्म चिकित्सकद्वारा ओपिडी सेवा र आकस्मिक सेवा दिँदै आइरहेको छ ।
२४ सै घण्टा इमरजेन्सी, ल्याब, फार्मेसी, भिडियो एक्स-रे, फिजीयोथेरापी सेवा, आँखा उपचार सेवा, हप्ताको दुई दिन सोमबार र बिहीबारका दिन भिडियो एक्स-रे र सबै सरकारी नियमित सेवाहरू यथावत् रूपमा सञ्चालन भई राखेको र हाल विभिन्न सेवाहरू बढाउने लक्ष्य सहित भौतिक संरचना निर्माण र जनशक्ति थप्ने योजना बनाएको अस्पतालका निमित्त व्यवस्थापक दिवस विष्टले बताए ।
हाल अस्पतालकै आम्दानीबाट फार्मेसी भवन र आधुनिक आकस्मिक कक्ष निर्माण भएको त्यस्तै सामान्य शल्यक्रियाका लागि भवन पनि निर्माणाधीन रहेको नगर प्रमुख कार्कीले बताए ।
समुद्घाटन कार्यक्रममा जिल्ला समन्वय समिति सुनसरीका सभापति राजन मेहता, नगर उपप्रमुख तथा नगर अस्पताल व्यवस्थापन समितिका उपाध्यक्ष नन्दकुमारी सुनुवार, प्रमुख प्रशासकीय अधिकृत गणेशबहादुर कटुवाल, रामलाल गोल्छा आँखा अस्पताल प्रतिष्ठानका उपाध्यक्ष विजयहरि शर्मा, वडा अध्यक्षहरू, कार्यपालिका सदस्यहरू, राजनैतिक दलका प्रतिनिधिहरू, नगर अस्पताल व्यवस्थापन समितिकाका सदस्य तथा सल्लाहकारहरू, रामलाल गोल्छा आँखा अस्पताल प्रतिष्ठानका पदाधिकारी र चिकित्सक तथा विभिन्न संघ संस्थाका प्रतिनिधिहरूको उपस्थित रहेको थियो ।
