विराटनगर । होलीका रङहरू प्राकृतिक होस् वा कृत्रिम, यसले छाला र कपालमा सुक्खापन निम्त्याउँछ ।
त्यसैले सुक्खा रङको लगातार प्रयोग र पटकपटक रङ निकाल्न पानीले धुँदा वा अन्य सामग्रीको प्रयोगले छाला र कपालमा प्राकृतिक तेलको कमी हुन सक्छ ।
जसले छाला सुक्खा हुने, पिम्पल आउने, कपाल सुक्खा हुने हुन्छ । होलीमा लगाएको रङ एकै पटकमा नजान सक्छ ।
यसका लागि मानिसहरूले पटक-पटक साबुन-पानीले रगडेर धुने गर्छन् । तर, यसले छालामा थप क्षति निम्त्याउन सक्छ । होलीको रङ समयसँग आफैँ जान्छ ।
होलीको रङ हटाउन, छालाको रङको साइड इफेक्टबाट छुटकारा पाउन र छालालाई नरम राख्नका लागि केमिकल प्रडक्टभन्दा पनि प्राकृतिक फेस प्याकको प्रयोग गर्न सकिने साई शृंगारका स्किन एन्ड ब्युटी थेरापिस्ट आकाश अग्रवाल बताउँछन् ।
उनका अनुसार प्राकृतिक फेस र हेयर प्याक घरमै सजिलैसँग बनाउन सकिन्छ ।
छालाको लागि फेस प्याकः
पाकेको मेवा, गुलाब जल, मह, र मुल्तानी मिट्टीको प्रयोग गरेर पपाया फेस मास्क तयार गर्न सकिन्छ । फेस प्याक वा मास्क १५ देखि २० मिनेट राख्ने र यसलाई चिसो पानीले पखाल्ने । वा कागतीको रस र महको बराबर भागको मिश्रण प्रयोग गरी पाँच मिनेटसम्म आफ्नो अनुहारलाई हल्का रूपमा मसाज गर्न सकिन्छ ।
केराको बोक्रालाई रगड्दा पनि होलीको रङबाट छुटकारा पाउन सकिन्छ ।
कपालको लागि हेयर मास्कः
होलीपछि कपाल धेरै सुक्खा भएमा हेयर प्याक लगाउन सकिन्छ । यसका लागि एक कप काँचो दूधमा एक चम्चा मह मिसाउने ।
अब यो मिश्रणलाई कपालको जरादेखि टुप्पोसम्म लगाउने । कपालमा लगाएको यस मिश्रणलाई आधा घण्टा वा एक घण्टाका लागि राख्ने । त्यसपछि मनतातो पानी प्रयोग गरी स्याम्पुले कपाल धुनुपर्छ ।
होली खेलेपछि एक हप्ताका लागि हरेक रात कपालमा तेल मालिस गर्नु प्रभावकारी हुन्छ । कपालमा बदाम, नरिवल, जैतुन र क्यास्टर तेलको मिश्रण प्रयोग गर्न सकिन्छ । वा साधारण नरिवल तेल मात्र प्रयोग गर्न सकिन्छ ।
