विराटनगर । नेकपा माओवादी केन्द्रले २०८४ को संसदीय निर्वाचनमा २०६४ को परिणामलाई दोहोर्याउने गरी तयारी सुरु गरेको छ ।
माओवादी केन्द्र प्रदेश १ ले २०६४ सालको निर्वाचनको परिणाम दोहोर्याउने गरी “जनवादी प्रजातान्त्रिक, तराई-मधेश जनजागरण अभियान” सञ्चालन गर्ने भएको हो ।
विराटनगरमा सोमबार पत्रकार सम्मेलन गर्दै कोशी प्रदेश समितिको बैठकले गरेको निर्णय सार्वजनिक गरिएको थियो ।
निर्णय सार्वजनिक गर्दै पार्टीका केन्द्रीय उपमहासचिव एवं कोशी प्रदेश इन्चार्ज हरिबोल गजुरेलले २०८४ मा २०६४ को परिणामलाई दोहोराउने गरी जनता सँग माओवादी तराई मधेस जनजागरण अभियान सञ्चालन गर्न लागेको बताए ।
नेकपा माओवादी केन्द्र जनयुद्ध पछि २०६४ सालको पहिलो संविधानको सभाको निर्वाचनमा प्रत्यक्ष र समानुपातिक गरेर २३८ सिट जितेको थियो ।
प्रत्यक्षतर्फ २४० मध्ये १२२ सिट माओवादीले जितेको बेला झापाबाट नेकपा एमालेका केपी शर्मा ओली, नेपाली कांग्रेसका कृष्ण सिटौला, मोरङबाट एमालेका भरतमोहन अधिकारी पराजित भएका थिए ।
गजुरेलले माओवादीलाई पुरानै अवस्थामा फर्काउन र सशक्त क्रान्तिकारी पार्टी बनाउन पार्टी छोडेर गएका नेता कार्यकर्तालाई पार्टीमा फर्काउने निर्णय भएको बताए ।
फागुन ३ गते नेकपा माओवादी केन्द्र कोशी प्रदेशको बैठक बसेको थियो । बैठकमा पार्टीका अध्यक्ष एवम् पूर्व प्रधानमन्त्री पुष्पकमल दाहाल (प्रचण्ड), वरिष्ठ उपाध्यक्ष एवं पूर्व उपप्रधानमन्त्री नारायण काजी श्रेष्ठ, सहभागी थिए ।
पार्टीको प्रदेश कार्यालय विराटनगरले जारी गरेको विज्ञप्तिमा फागुन १२ देखि विभिन्न कार्यक्रमहरू आयोजना गरिने उल्लेख छ ।
कार्यक्रम अनुसार फागुन १२ गते कानेपोखरी गाउँपालिकामा अभियानको उद्घाटन हुनेछ । उद्घाटन कार्यक्रममा पार्टीका अध्यक्ष प्रचण्डसहित पदाधिकारी टिम सहभागी हुने जनाइएको छ ।
त्यसैगरी फागुन १३ गते मोरङको रतुवामाई नगरपालिका र विराटनगरमा जनसम्वाद कार्यक्रम हुनेछ । फागुन १४ गते सुनसरीको वर्जु गाउँपालिकामा पनि विभिन्न कार्यक्रमहरू आयोजना गरिने भएको छ ।
अभियान अन्तर्गत पार्टी प्रवेश कार्यक्रम, समाजवादी संस्कृति र चेतना जगाउने कार्यक्रम, किसान समस्या समाधान र कृषि विकास सम्बन्धी कार्यक्रमहरू पनि सञ्चालन गरिने विज्ञप्तिमा उल्लेख छ ।
यसका साथै भ्रष्टाचार, हिलालुटी, कर छली र अनियमितताविरुद्ध पनि अभियान सञ्चालन गरिने भएको छ । कार्यक्रममा पार्टीका वरिष्ठ नेताहरू सहभागी हुने जनाइएको छ ।
विज्ञप्तिमा उल्लेख भए अनुसार बैठकबाट १२ वटा समसामयिक प्रस्ताव पारित गरिएको छ ।
नेकपा माओवादी केन्द्र कोशी प्रदेशका अध्यक्ष हर्कबहादुर नेम्वाङ (मिक्सो) ले अभियानको दौरान सुनसरी, मोरङ र झापाबाट ५ हजार नेता कार्यकर्तालाई पार्टीमा प्रवेश गराउने तयारी सुरु भइसकेको बताए ।
