विराटनगर । विराटनगर महानगरपालिका–५ बरगाछीमा रहेको लाइफ गार्ड हस्पिटलले वरिष्ठ फिजिसियन डाक्टर मोहन खड्कालाई स्वागत गरेको छ । सोमबार अस्पतालमा एक कार्यक्रमको आयोजना गर्दै पाचन स्वास्थ्यका विशेषज्ञ डाक्टर खड्कालाई स्वागत गरिएको थियो ।
विराट टिचिङ हस्पिटल, नोबेल अस्पतालमा काम गरिसकेका डाक्टर खड्कालाई अस्पतालका म्यानेजिङ डाइरेक्टर इन्द्रबहादुर भुजेल, अध्यक्ष डा. शिवराजा ओझा, अस्पताल म्यानेजर निरोज श्रेष्ठ, सञ्चालक समिति सदस्य युरो सर्जन इकवाल अहमदलगायतले स्वागत गरेका थिए ।
स्वागत कार्यक्रममा बोल्दै एमडी भुजलेले कोशी प्रदेशकै अनुभवी वरिष्ठ डिएम ग्यास्ट्रोइन्टेरोलोजिस्ट खड्कालाई भित्र्याउन डेढ करोड खर्चिएर अत्याधुनिक उपकरण जोडेको सुनाए । आवश्यक स्वास्थ्य औजार थपेर उपचार प्रक्रियालाई व्यवस्थित गर्ने उनको भनाइ छ ।
लेटाङ नगरपालिका स्थायी घर भएका खड्काले २२ वर्षअघि एमबिबिएस डाक्टरको उपाधि पाएका हुन् । खड्काले भारतको मणिपाल कलेज अफ मेडिकल साइन्सेसमा एमबिबिएस सकेका थिए । शिक्षा मन्त्रालयबाट सर्वोत्कृष्ट हुँदै छात्रवृत्तिमा एमबिबिएस पढेका डा. खड्काले थुप्रै मुलुकबाट डिग्री र अनुभव संगालेका छन् ।
पछिल्लो चार वर्षयता विराटनगर बसेर स्वास्थ्यकर्मीको भूमिका निभाइरहेका उनले एमबिबिएसका अलावा एमडी र डिएम पनि सकेका छन् । पाचन प्रणालीसँग सम्बन्धित रोगका विशेषज्ञसमेत रहेका खड्काले अब लाइफगार्ड हस्पिटलमा पाचन प्रक्रियासँग सम्बन्धित स्वास्थ्यसमस्याका साथै ग्यास्ट्रिक, सानो र ठुलो आन्द्रा, प्यानक्रियाज र कलेजोसम्बन्धी कुनै पनि रोगको उपचार हुने बताए ।
त्यसबाहेक इन्डोस्कोपी तथा कोलोनोस्कपी गरेर तत्काल अपरेसन गर्ने तथा पित्तनलीमा भएको पत्थरी हटाउने र जन्डिसम्मको उपचार आफूले बिरामीलाई उपचार गर्ने बताउँदै डाक्टर खड्काले विपन्न वर्गका बिरामीलाई भने निःशुल्क परीक्षण र उपचार पनि गर्ने प्रतिबद्धता जनाए ।
अत्याधुनिक प्रविधिद्विारा दीर्घकालीन पेट दुखाइ, पेट सुन्निएको, अल्सर, कलेजो र प्यान्क्रियाज रोग, पाचनसम्बन्धी सम्पूर्ण रोगको उपचार तथा उचित परामर्शका साथै उच्चस्तरीय इन्डोस्कोपी, कोलोनोस्कोपी र इआरसिपीको सुविधासहित उपचार हुने डाक्टर खड्काको भनाइ छ ।
