विराटनगर । कोशी प्रदेशका मुख्यमन्त्री हिक्मतकुमार कार्कीले प्रादेशिक आम सञ्चार विधेयक सहमति मै पारित हुने बताएका छन् ।
विराटनगरमा बुधबार प्रेस चौतारी कोशी प्रदेश समितिको दोस्रो अधिवेशनको उद्घाटन कार्यक्रममा बोल्दै मुख्यमन्त्री कार्कीले प्रादेशिक आम सञ्चार विधेयक सहमति मै पारित गर्न विधेयकमाथि पर्याप्त छलफल गर्ने सुनाए ।
प्रदेशसभामा पेश भएको प्रादेशिक सञ्चार विधेयकमा कमी-कमजोरी भए सच्याएर अघि बढ्नेसमेत प्रतिबद्धता उनले व्यक्त गरे ।
मुख्यमन्त्री कार्कीले अहिले अध्यादेशको विषयमा अनावश्यक रूपमा बखेडा झिक्न खोजेको समेत बताए ।
‘सरकारले ल्याउने विधेयकका विषयमा दलका नेताहरूले पनि विरोध गरिरहेको सुनिन्छ तर अध्यादेश संवैधानिक हो । सदनबाट पारित नभए खारेज हुन्छ तर अध्यादेश ल्याउन नपाउने भन्ने हुन्न,’ उनले भने ।
यसअघिका सरकारहरू र प्रदेश सरकारहरूले पनि अध्यादेश ल्याउने गरेको चर्चा गर्दै मुख्यमन्त्री कार्कीले आगामी दिनमा सरकार चलाउनेहरूले अनावश्यक रूपमा विधेयकहरूको विरोध गर्न नहुने बताए ।
यसैगरी कोशी प्रदेशको विकासका प्रदेश सरकारले विभिन्न योजनाहरू सुरु गरिएको उनले बताए ।
मुख्यमन्त्री कार्कीले कोशी प्रदेशको पर्यटन विकासका लागि विभिन्न पदमार्गहरु निर्माणको काम सुरु गरिएको जानकारी दिए ।
प्रदेश सरकारले २९ वटा पालिका जोड्नेगरी चारवटा पदमार्ग निर्माणको काम दातृ निकायसँगको सहकार्यमा सुरु गरेको जानकारी दिए ।
पछिल्लो समयमा विकास निर्माणको क्रम बढेको बताउँदै उनले नयाँ सत्ता समिकरण बनेपछि सकारात्मक परिवर्तनहरू देखिन थालेको बताए ।
