विराटनगर । ब्राजिलियन स्टार खेलाडी नेयमारले साउदीको क्लब अल हिलालसँगको सम्झौता रद्द गरेका छन् ।
३२ वर्षीय नेयमार र क्लबले आपसी समझदारीमा सम्झौता रद्द गरेका समाचारमा जनाइएको छ ।
सन् २०२३ को अगष्टमा ९० मिलियन युरोमा अल हिलाल पुगेका नेयमारले ज्यादाजसो समय चोटका कारण खेल्न सकेनन् ।
चोटकै कारण क्लबका लागि मात्र ३ पटक उनले खेले ।
साउदी छाडेका नेयमार अब बाल्यकालको क्लब सान्तोष फर्कने तयारी गरिरहेका छन् ।
उनी हिलालअघि फ्रान्सको पिएसजीमा अनुबन्ध भएका थिए ।
त्यसअघि बार्सिलोनामा रहँदा उनको करिअर उच्च लयमा थियो ।
सन् २०१३ देखि २०१७ सम्म स्पेनको क्लब बार्सिलोनामा रहँदा उनले १२३ खेलमा ६८ गोल गरेका थिए ।
राष्ट्रिय टिमबाट भने उनले १२८ खेलबाट ७९ गोल गरेका छन् ।
उनले ब्राजिललाई एक पटक कोपा अमेरिकाको उपाधि जिताएका थिए ।
