विराटनगर । पूर्वराष्ट्रपति विद्यादेवी भण्डारीले आफू राष्ट्रिय राजनीतिमा सक्रिय रहेको बताएकी छन् ।
विराटनगरमा सोमबार पत्रकारहरूसँग भेटघाट गर्दै पूर्वराष्ट्रपति भण्डारीले आफूले शिक्षा, स्वास्थ्य, आर्थिक समानता, जलवायु र वातावरणको विषयमा छलफल गरिरहेको र ती विषय राजनीतिभन्दा भिन्न नरहेको बताएकी हुन् ।
उनले भनिन्, ‘हामी कोही पनि राजनीतिबाट फरक छैनौं, तपाईंहरूले कसरी बुझ्नुहुन्छ । तर, मैले पछिल्लो समय शिक्षा, स्वास्थ्य, जलवायु आदि विषयमा जसरी छलफल गरिरहेकी छु । ती राजनीतिबाट भिन्न छैनन्, त्यस अर्थमा म राष्ट्रिय राजनीतिमा सक्रिय नै छु । रह्यो दलीय राजनीतिको कुरा त्यस विषयमा अहिले म प्रवेश गरिसकेको छैन, राष्ट्रिय, अन्तर्राष्ट्रिय आदि परिवेशहरू पनि छन्, समय आएपछि कुन दलको राजनीति कसरी गर्ने वा नगर्ने भन्ने होला ।’
उनले दलीय राजनीतिमा आएको खण्डमा नेकपा एमाले नै आफ्नो रोजाइमा पर्नसक्ने संकेत गरिन् । उनले भनिन्, ‘म नेकपा एमालेबाट हुर्किएकाले जाँदा त्यहाँ नै हो । तर छलफलको चरणमा प्रवेश गरेको छैन ।’
पत्रकारहरूको प्रश्नको जवाफ दिने क्रममा पूर्वराष्ट्रपति विद्यादेवी भण्डारीले पूर्वउपराष्ट्रपति नन्दबहादुर पुनः माओवादी केन्द्रको राजनीतिमा सहभागी भएकोमा आफूलाई खुसी लागेको बताइन् ।
‘उहाँ युवा हुनुहुन्छ, अनुभव छ, राजनीति गरेर आउनु भएको हो । म राष्ट्रपति, उहाँ उपराष्ट्रपति भएर सात वर्ष सहकार्य गरेको हो । खुसी नै लागेको छ, मेरो शुभेच्छा छ,’ पूर्वराष्ट्रपति भण्डारीले भनिन् ।
पछिल्ला समय मिडियाहरूमा आफ्नो राजनीतिक सक्रियता आदि विषयमा भएका चर्चाहरू सही नभएको र कसैले भ्रम नराख्न आग्रह गरिन् ।
