विराटनगर । मोरङको बूढीगंगा गाउँपालिका-४ स्थित कोशी लोकमार्गमा सवारी चालक तथा सह-चालकहरूको स्वास्थ्य परीक्षण तथा लागुऔषध पदार्थ सेवन (लापसे) जाँच गरिएको छ ।
मंगलबार सुरक्षा निकायले सडक सुरक्षा र दुर्घटना न्यूनीकरणका लागि सवारी चालक तथा सहचालकहरूको स्वास्थ्य परीक्षण तथा लापसे जाँच गरेको हो ।
जिल्ला प्रशासन कार्यालय मोरङ, जिल्ला प्रहरी कार्यालय मोरङ, जिल्ला ट्राफिक प्रहरी कार्यालय मोरङ र बूढीगंगा गाउँपालिका तथा विराट टिचिङ अस्पतालको सहकार्यमा उक्त स्वास्थ्य शिविर गरिएको थियो ।
शिवरमा ५० जना सडक प्रयोगकर्ता, ५५ जना चालक तथा सहचालकहरूको स्वास्थ्य परीक्षण गरिएको थियो ।
जसमा ११ जना सवारी चालकहरूले लापसे सेवन गरेको पाइएकोले आवश्यक कारबाहीको लागि नियन्त्रणमा लिइएको प्रहरीले जनाएको छ ।
कोशी प्रदेश प्रहरी प्रमुख प्रहरी नायव महानिरीक्षक राजन अधिकारीको प्रमुख आथित्यता तथा जिल्ला प्रशासन कार्यालय मोरङका प्रमुख प्रेमप्रसाद भट्टराईको अध्यक्षतामा उक्त कार्यक्रम भएको थियो ।
कार्यक्रमलाई सम्बोधन गर्दै प्रमुख अतिथि अधिकारीले सवारी साधन हाम्रो दिनचर्यालाई सहज बनाउन अति आवश्यक भए पनि सवारी साधनबाट हुने दुर्घटना हाम्रोसामु ठुलो चुनौतीका रूपमा रहेको सुनाए ।
यस्ता विविध कारणबाट हुने सवारी दुर्घटनाहरूमध्ये सबैभन्दा बढी चालकको लापरबाहीको कारणबाट भएको तथ्यांकले देखाउने उनको भनाइ छ ।
तीमध्ये कतिपय दुर्घटनाहरू चालकहरूको स्वास्थ्य अवस्था कमजोर भएर पनि हुने गरेको कारण एउटा स्वस्थ्य चालकले मात्र सुरक्षित यात्रा सुनिश्चित गर्न सक्छ भन्ने उद्देश्यले स्वास्थ्य शिविरको आयोजना गरिएको बताए ।
कार्यक्रममा जिल्ला प्रहरी कार्यालय मोरङका प्रहरी प्रमुख प्रहरी उपरीक्षक नारायणप्रसाद चिमरीया, नेपाल प्रहरी राजमार्ग सुरक्षा तथा ट्राफिक ब्यवस्थापन कार्यालय इटहरीका प्रमुख प्रहरी उपरीक्षक विनोद घिमिरे, विभिन्न सुरक्षा निकायका प्रमुखहरू स्थानीय जनप्रतिनिधिहरूको उपस्थिति थियो ।
