विराटनगर । इटालियन क्लब एसी मिलानका नवनियुक्त प्रशिक्षक सर्जियो कन्सेइसाओले मात्र एक सातामै आफ्नो पहिलो उपाधि जित्न सफल भएका छन् ।
मिलानले सोमबार इटालियन सुपर कपको फाइनलमा चिरप्रतिद्वन्द्वी इन्टर मिलानलाई ३-२ को रोमाञ्चक जितसँगै उपाधि हात पारेको हो ।
यो मिलानको आठौं सुपर कप उपाधि हो, जुन सन् २०१६ पछिको पहिलो हो ।
खेलमा दुई गोलले पछि परेको अवस्थामा राफाएल लिओको प्रभावशाली प्रवेशले खेलको मोड फेर्यो । उनले मिलानका तीनवटै गोलमा महत्वपूर्ण भूमिका निभाए, जसमा हर्नान्डेज, क्रिस्टियन पुलिसिच र टैमी अब्राहमले गोल गरे ।
पाउलो फोन्सेका बर्खास्त भएपछि सोमबार नै नियुक्त भएका कन्सेइसाओले यसअघि सेमिफाइनलमा युभेन्टसविरुद्ध पनि कमब्याक जित हासिल गरेका थिए ।
खेलाडीहरूले नयाँ प्रशिक्षकको रणनीतिभन्दा जित्ने भोकले प्रेरित भएको बताए ।
खेलमा इन्टरका लौटारो मार्टिनेज र मेहदी तारेमीले दुई गोलको अग्रता दिलाएका थिए । तर, लिओको सहयोगमा हर्नान्डेजको उत्कृष्ट कर्लिङ गोल र पुलिसिचको समानीकरण गोलले खेल बराबरीमा आयो ।
इन्जुरी समयमा लिओको थ्रुबलमा पुलिसिचको पासबाट अब्राहमले विजयी गोल गरे ।
सिरी ‘ए’ मा आठौं स्थानमा रहेको मिलानका लागि यो जितले नयाँ आशा जगाएको छ ।
साउदी अरबमा आयोजित यो प्रतियोगिता पछिल्ला सात वर्षमा पाँचौं पटक खेलाइएको हो । अब मिलानले शनिबार काग्लियारीविरुद्ध लिग खेल खेल्नेछ ।
