विश्वकै सबैभन्दा वृद्ध जापानी महिला टोमिको इटोकाको ११६ वर्षको उमेरमा निधन भएको छ । आफ्नै नर्सिङ होममा शनिबार उनको निधन भएको आशिया सहरका मेयरले जानकारी दिएका छन् ।
इटोका उक्त नर्सिङ होममा पछिल्लो पाँच वर्षयता रहँदै आएकी थिइन् । इटोकाका चार छोराछोरी र पाँच नातिनातिना छन् ।
उनको जन्म आशियानजिकैको ओसाकाको वाणिज्य केन्द्रमा सन् १९०८ मे २३ मा भएको थियो ।
स्पेनकी मारिया ब्रान्यास मोरेराको ११७ वर्षको उमेरमा अगस्ट सन् २०२४ मा मृत्यु भएपछि इटोकालाई विश्वको सबैभन्दा वृद्ध व्यक्तिको रूपमा मान्यता दिइएको थियो ।
सेप्टेम्बर २०२४ मा गिनिज बुक अफ रेकर्डले उनलाई सर्वाधिक वृद्धा महिला घोषणा गरेको थियो । त्यसबेला उनले आफ्नो ११६औं जन्मदिन मनाउँदै थिइन् । त्यसबखत टोमिको २३औं सबैभन्दा वृद्ध व्यक्ति थिइन् ।
मेइजी सम्राटको शासनकालमा ओसाकामा जन्मिएकी टोमिको आफ्नो परिवारकी जेठी छोरी र माझिलो सन्तान थिइन् ।
प्राथमिक शिक्षा पूरा गरेपछि उनले एक बालिका विद्यालयमा अध्ययन गरिन्, जहाँ उनी भलिबल टोलीकी सक्रिय सदस्य थिइन् । २० वर्षको उमेरमा विवाह गरेपछि उनका दुई छोरी र दुई छोराको जन्म भयो । उनका धेरै नाति–नातिना र पनाति–पनातिनाहरू पनि छन् ।
जब जापान दोस्रो विश्वयुद्धमा सामेल भयो, त्यस बेला टोमिको ३२ वर्षकी थिइन् । युद्धकालमा उनले आफ्ना सबै बालबच्चाको हेरचाह गर्नुको साथै श्रीमानको कपडा कारखानाको कार्यालय पनि सम्हाल्नुपर्थ्यो ।
१९७९ मा श्रीमानको निधनपछि उनी नारा प्रिफेक्चरमा एक्लै बस्न थालिन् । त्यहाँ उनले हाइकिङ र पर्वतारोहणमा आफ्नो समय बिताइन् ।
उनी नियमित रूपमा माउन्ट निजो चढ्थिन् । र ३,००० मिटर अग्लो माउन्ट ओन्टाकेको शिखरमा दुईपटक पुग्न सफलसमेत भइन् ।
एक समर्पित बौद्ध धर्मावलम्बीको रूपमा उनले ८० वर्षको उमेरमा कान्साई क्षेत्रका ३३ मन्दिरहरूको साइगोकु कन्नन तीर्थयात्रा पूरा गरिन् ।
१०० वर्षको उमेरमा पनि उनी कुनै लठ्ठीको सहायताविना आशिया मन्दिरका ढुङ्गाका सिंढीहरू चढ्न सक्षम भएकी थिइन् ।
उनको परिवारका अनुसार, सक्रिय जीवनशैली नै उनको दीर्घायुको रहस्य थियो । १११ वर्षको उमेरसम्म उनी आफ्ना छोरीहरूसँग घरमै बसेकी थिइन् ।
तर, शरीर कमजोर बन्दै गएपछि उनी आफ्नै नर्सिङ होममा बस्न थालेकी थिइन् ।
