विराटनगर । नाक वरिपरिको हड्डीमा हावा भरिएको खाली भागमा साइनसको संक्रमण हुनुलाई पिनास भनिन्छ ।
सुरुमा नाक बन्द हुन्छ र विस्तारै यो पिनासको समस्यामा परिणत हुँदै जान्छ ।
रुघाखोकीको समस्यासँगै टाउको दुख्ने, अनुहारको दुखाइ वा दबाब महसुस भएमा, नाक बन्द हुने समस्या केही हप्तासम्म रहिरहेमा यो साइनस संक्रमणको लक्षण हुनसक्ने हुँदा तुरुन्त चिकित्सकसँग सम्पर्क गर्नुपर्छ ।
रुघाखोकी र एलर्जीबाहेक जाडोको चिसो हावाले पनि यो समस्यालाई बढाउन सक्छ ।
हावासँगै धुलोका साना कणहरू हाम्रो साइनसमा प्रवेश गर्छ र सुन्निने समस्या बढाउँछ ।
यस्तो अवस्थामा घरपालुवा जनावरको रौँबाट पनि साइनसको संक्रमण बढ्न सक्छ ।
साइनसको समस्या भाइरसको कारणले हुन्छ तर कतिपय अवस्थामा ब्याक्टेरिया र फंगसले पनि हुन सक्छ ।
भाइरल इन्फेक्सनका कारण साइनस भएमा यो अरुलाई पनि सर्न सक्छ ।
साइनस इन्फेक्सनमा नाकबाट सिँगान बग्ने समस्या देख्न सकिन्छ ।
यसबाहेक टाउको दुखाइ, नाक बन्द हुने वा अनुहारमा दुखाइ पनि महसुस हुन्छ ।
यस्ता लक्षणहरूलाई लगातार बेवास्ता गर्दा दुखाइ थप बढ्छ ।
जाडोमा साइनस इन्फेक्सनबाट बच्न केही विशेष कुरामा ध्यान दिनु जरुरी हुन्छ ।
बाहिरी कीटाणु मुखभित्र पस्न नदिनका लागि खाना खानु अघि र पछि हात राम्ररी धुनुपर्छ ।
साइनसको दुखाइबाट राहत पाउनको लागि शरीरलाई हाइड्रेट राख्न जरुरी हुन्छ ।
तरल पदार्थहरूले सिँगान पातलो पार्ने हुँदा यसले नाकलाई राहत प्रदान गर्छ ।
नियमित बाफ लिएर पनि साइनसको सङ्क्रमणबाट राहत पाउन सकिन्छ ।
वाफले बन्द भएको नाकको प्यासेज सफा गर्न मद्दत गर्छ ।
प्रदूषण वा एलर्जीको जोखिमबाट मुखलाई मास्कको प्रयोग गर्नुपर्छ ।
