विराटनगर । नेपाली कांग्रेस प्रभावशाली नेता डा. शेखर कोइरालाले जनताको घरदैलोमै पुगेर समस्या र सुझाव संकलनको कामलाई तीव्रता दिएका छन् ।
मंसिर २०७९ को निर्वाचनमा मोरङ क्षेत्र नम्बर ६ बाट निर्वाचित कोइरालाले आफ्नो निर्वाचन क्षेत्रका जनताको घरदैलो पुग्ने क्रमलाई तीव्रता दिएका हुन् ।
बिहीबार बिहान विराटनगर महानगरपालिकाका मेयर नागेश कोइरालालाई साथमा लिएर कोइराला आफ्नो निर्वाचन क्षेत्र पुगेका थिए ।
सांसद कोइरालाले विराटनगर महानगरपालिका-१२ को बखरी क्षेत्रका स्थानीयसँग भेटघाट गरेका थिए ।
भेटघाटका क्रममा कोइरालासित स्थानीयले सडक र नाला निर्माणसँगै डुबान समस्या समाधान गर्न माग गरेका थिए ।
उनीहरूले फोहोर व्यवस्थापन, रोजगारी सिर्जना, लागूऔषध नियन्त्रणलगायतका विषय पनि उठाएका थिए ।
निर्वाचित भएर गएपछि जनतालाई बेवास्ता गर्ने गरेको भन्दै जनप्रतिनिधिमाथि लागेको आरोप चिर्दै सांसद कोइरालाले जनताको घरदैलोमै पुग्ने कामलाई तीव्रता दिन थालेका हुन् ।
कोइरालाले यसअघि पनि निर्वाचन क्षेत्रका जनताको घरदैलोमा पुगेर उनीहरूका विभिन्न समस्याहरू समाधान गर्दै आएका थिए ।
स्वास्थ्यकर्मीसमेत भएका नाताले कहिलेकाँही उनले जनताको स्वास्थ्य जाँच्नेसमेत गरेका थिए । तथापि, कोइराला पार्टीका विभिन्न कार्यक्रममा देश दौडाहामा हुँदा क्षेत्रमा कम आउने गरेको गुनासो थियो ।
यसैले जनताको समस्या र सुझाव लिने क्रमलाई उनले विगतमा भन्दा बाक्लो बनाएका हुन् ।
दसैं-तिहारयता भने सांसद कोइराला काठमाडौंमा भन्दा विराटनगरमै बढी बस्न थालेका छन् । पार्टीको कार्यक्रम सकेर उनी विराटनगर नै फर्किने गरेका छन् ।
केही दिनअघि सुदूरपश्चिम प्रदेशका विभिन्न जिल्लामा आयोजित कार्यक्रममा सहभागी भएर नेता कोइराला पुनः विराटनगर फर्किएका थिए ।
पार्टीको १५औं महाधिवेशनमा कोइराला कांग्रेस सभापति बन्ने तरखरमा छन् । मंसिर २०७८ मा भएको अघिल्लो महाधिवेशनमा उनी शेरबहादुर देउवासँग पराजित बनेका थिए ।
