विराटनगर । राष्ट्रिय क्रिकेट टोलीमा एकसाथ रहेर नेपालका लागि खेलेका दाजुभाइले काठमाडौंमा जारी नेपाल प्रिमियर लिगमा एकअर्काविरुद्ध खेलेका छन् । राष्ट्रिय टिमका सदस्यद्वय आरिफ शेख र आसिफ शेखले बुधबार एकअर्काविरुद्ध खेलेका हुन् ।
जनकपुर बोल्ट्सका मार्की खेलाडी आसिफ र सुदूरपश्चिम रोयल्सका खेलाडी आरिफको टोलीले कीर्तिपुरको त्रिवि मैदानमा एकअर्कासँग खलेका हुन् । एनपिएलमा दाजुभाइले एक–अर्काविरुद्ध खेलेको यो पहिलोपटक हो ।
बुधबार सुदूरपश्चिमका आरिफले ब्याटिङ गरिरहँदा जनकपुरका आसिफ शेख विकेट किपिरको भूमिकामा थिए ।
जनकपुरसँगको खेलमा आरिफ ९ बलमा ६ रन जोडेर क्याचआउट भएका थिए । यता, ओपनिङ ब्याट्सम्यान आसिफले सुदूरपश्चिमविरुद्ध ५ बलमा ४ रनमात्र जोडे । उनी पनि क्याच आउट नै भएका थिए ।
प्रतियोगितामा बलियो रूपमा प्रस्तुत भएको जनकपुरलाई सुदूरपश्चिमले ७२ हरायो । टस हारेर ब्याटिङमा उत्रिएको सुदूरपश्चिमले ९ विकेटको क्षतिमा १२३ रन बनाएको थियो । १२४ रनको लक्ष्यसहित ब्याटिङ थालेको जनकपुरले १२.१ ओभरमा ५१ रन बनायो ।
शेख दाजुभाइ वीरगञ्जका हुन् । दाइ आरिफ उमेरले २७ वर्ष पुगेका छन् भने भाइ आसिफ २३ वर्ष पुगेका छन् । उनीहरूका बुबा मोहमद सलाम शेख पेसाले मेकानिकल ईन्जिनिनर हुन् । उनी वीरगन्जमा मोटरसाइकल ग्यारेज सञ्चालन गर्छन् । दाइ आरिफ सन् २०१४ मा यू–१९ राष्ट्रिय क्रिकेट टिममा पर्न सफल भएका थिए ।
भाइ आसिफ २०१७ मा नेपालको राष्ट्रिय टिममा परेका थिए । त्यतिबेला पनि आरिफ र आसिफ दुबै जनाले बंगलादेशमा भएको एसिसी इमर्जिङ नेसन्स कपमा प्रतिस्पर्धा गरेका थिए । शेख दाजुभाइले त्यतिबेला हङकङविरुद्ध सँगै खेलका थिए ।
