झापा- प्रधानमन्त्री तथा नेकपा एमालेका अध्यक्ष केपी शर्मा ओलीले कम्बोडिया प्रकरण निकालेर बदनाम गराउन खोजिएको भन्दै दुखेसो गरेका छन् ।
आफ्नो लगानीबारेको चर्चा निराधार तथा नक्कली भएको बताउँदै उनले त्यस्तो दुखेसो गरेका हुन् ।
आफूविरुद्ध विगत चार/पाँच वर्षदेखि सोही विषयमा आफ्नो बदनाम गराउन खोजिएको ओलीले बताए ।
उनले भने, ‘जस्ले कागजात देखायो उसैले नक्कली भनिसक्यो। उसैले केपी ओलीलाई बदनाम गराउन भनेको हुँ भने रे ।’
उनको भनाइ साइबर अपराध मुद्दामा प्रहरी थुनामा रहेका दुर्गा प्रसाईंप्रति लक्षित थियो ।
उनले एमाले देशको शक्ति भएकाले धेरैतिरबाट आक्रमण भइरहेको बताए ।
सोमबार एमाले झापाले आयोजना गरेको बृहत् कार्यकर्ता भेलालाई सम्बोधन गर्दै ओलीले एमालेको शक्ति अहिले आक्रमण भइरहेको बताए ।
उनले पार्टी तथा आफूविरुद्ध चर्का नाराबाजी तथा कालो झण्डा देखाउने काम भइरहेको बताए ।
उनले भने, ‘केही नभए पनि अलि परबाट भए पनि मुख छाड्ने प्रवृत्ति देखिएको छ ।’
उनले साइबर अपराध मुद्दामा प्रहरी हिरासतमा रहेका दुर्गा प्रसाईंलाई लक्षित गर्दै बैंक ठगी गरेर प्रधानमन्त्री बन्ने सपना नदेख्न चेतावनी दिए ।
ओलीले भने, ‘प्रधानमन्त्री हुन भिजन चाहिन्छ, जनताबाट अनुमोदन भएको हुनुपर्छ । बैंक ठगेर प्रधानमन्त्री बन्ने सपना नदेखे हुन्छ ।’
