विराटनगर । बिहान उठ्नेबित्तिकै ग्रीन टी सेवन गर्ने मानिसहरू प्रशस्त हुन्छन् ।
जाडोमा दिउँसो समेत ग्रीन टी खानेहरूको संख्या दिन प्रतिदिन बढ्दो छ । कतिपय व्यक्तिहरू त डाइटिङका लागिसमेत ग्रीन टीको सेवन गर्ने बताउँछन् ।
ग्रीन टीका फाइदाहरू त धेरै छन् । ग्रीन टीको सेवनले क्यान्सरको जोखिम घटाउने अध्ययनले देखाएको छ ।
वैज्ञानिकहरूका अनुसार ग्रीन टीको सेवनले शरीरमा एन्टी–क्यान्सर प्रोटिन (पी ५३) को स्तर बढ्छ ।
यस प्रोटिनले क्षति भएको डीएनएलाई मर्मत गर्नुको साथै क्यान्सरका कोषहरूलाई पनि मार्छ ।
नेचर कम्युनिकेसन जर्नलमा प्रकाशित अध्ययनका अनुसार ग्रीन टीमा पाइने विशेष प्रकारको तत्व इपिगेलोक्याटेचिन ग्यालेट (इजिसिजी)ले शरीरमा एन्टी क्यान्सर प्रोटिन पी ५३ को स्तर बढाउन मद्दत गर्छ ।
हप्ताको कम्तीमा तीन पटक ग्रीन टीको सेवनले क्यान्सरको जोखिम मात्र नभइ अन्य व्यक्तिको तुलनामा हृदयसम्बन्धी रोगहरू हुने खतरा पनि २० प्रतिशतले घटाउँछ ।
एक लाखभन्दा बढी व्यक्तिको सात वर्षसम्म गरेको अनुसन्धानले त्यस्ता व्यक्तिहरू १५ महिना बढी बाँच्ने दाबी गरेको छ ।
अनुसन्धानमा संलग्न वरिष्ठ अनुसन्धानकर्ता डोङ्गफेङ्ग ग्युका अनुसार ग्रीन टीमा पाइने एन्टिअक्सिडन्टले भरिपूर्ण माइक्रोन्यूट्रिएन्ट पोलिफेनल्सका कारणले विभिन्न रोगको जोखिम कम गर्ने हुन्छ ।
ग्रीन टीको सेवनले क्यान्सर र हृदय रोगबाट नभइ मधुमेह, पार्किन्सन्स, अल्जाइमर र मोटोपनासँह सम्बन्धित समस्याहरू हटाउन सहयोगी हुन्छ ।
एक दिनमा दुई कपभन्दा बढी ग्रीन टीको सेवन गर्नु हुँदैन ।
सबैभन्दा महत्त्वपूर्ण कुरा यसमा चिनी प्रयोग गर्नु हुँदैन ।
चिनीको सट्टा मह प्रयोग गर्न सकिन्छ ।
ग्रीन टीलाई साँझ ६ बजेभन्दा अगाडि पिउनु पर्छ नत्र केही मानिसमा निन्द्रा नलाग्ने समस्या हुन सक्छ ।
