विराटनगर । दैनिक चार घण्टाभन्दा बढी टिभीअगाडि बस्नाले निद्रामा समस्या (स्लिप एपनिया) र यसको परिणामस्वरूप घुर्ने समस्या बढ्ने अध्ययनले देखाएको छ ।
हार्वर्ड मेडिकल स्कूलका साथ अनुसन्धानकर्ताहरूले १० वर्षको लागि करिब एक लाख ३८ हजार व्यक्तिको स्वास्थ्य र शारीरिक गतिविधिको स्तर अनुगमन गरेपछि टिभीअगाडि लामो समय बस्नाले घुर्ने समस्या ७८ प्रतिशतले बढ्ने पत्ता लागेको हो ।
आसिन जीवनशैली बढ्नाले र शारीरिक गतिविधिको निम्न स्तरका कारण निद्रामा समस्या ( स्लिप एपनिया) को जोखिम बढेको अध्ययनले देखाएको छ ।
अन्य कारणले शारीरिक गतिविधि कम भएपनि टिभी हेर्दै बिताएको जंक फुड र कोल्ड ड्रिंक्सको सेवन गर्ने सम्भावना बढी हुने हुँदा मोटोपनाको जोखिम बढ्छ ।
जसकारण पनि टिभी हेर्दा स्लिप एपनियाको सम्भावना धेरै हुन्छ ।
स्लिप एपनियाको समस्या भएको मानिसको वायुमार्ग रातको समयमा पूर्ण रूपमा अवरुद्ध हुन सक्छ जसले सास फेर्न बाधा पुर्याउने, घुर्ने समस्या हुने र निद्रामा बाधा पुर्याउने हुन्छ ।
समयमा उपचार नगरिएको खण्डमा यसले क्यान्सर, जलबिन्दु, हार्ट अट्याक, उच्च रक्तचाप, स्ट्रोक, टाइप २ मधुमेह र संज्ञानात्मक र व्यवहारसम्बन्धी समस्याहरूको जोखिम बढाउन सक्छ ।
विश्व स्वास्थ्य सङ्गठन (डब्ल्युएचओ)को शारीरिक गतिविधि गाइडलाइन पालना गरी प्रतिहप्ता कम्तिमा एक सय ५० मिनेट मध्यम क्रियाकलाप गर्ने र टिभी हेर्न प्रतिदिन चार घण्टाभन्दा कम समय बिताउने मानिसहरूका स्लिप एपनियाको जोखिम कम भएको पाइएको थियो ।
