विराटनगर । कोशी प्रदेशको आर्थिक मामिला तथा योजना मन्त्रालयले आफ्ना कर्मचारीहरूका लागि भाडामा घर लिन १५ दिने सूचना जारी गरेको छ ।
गत साता पहिलो पटक सूचना प्रकाशित गरी मन्त्रालयले मंसिर २५ गतेसम्ममा घरधनीलाई निवेदन दिनसक्ने जनाएको छ ।
घर भाडामा लगाउन इच्छुक घरधनीले आफूले दिनसक्ने बहाल दररेट खुलाई रितपूर्वकको निवेदन पेश गर्न मन्त्रालयले सूचना जारी गरेको हो ।
भाडा लिनुपर्ने घरहरू विराटनगर महानगरपालिका क्षेत्रभित्र मन्त्रालयबाट करिब ५ किलोमिटरको दूरीभित्र अवस्थित हुनुपर्ने सूचनामा उल्लेख छ ।
चारैतिर कम्पाउन्ड वालले घेराबार भएको हुनुपर्ने, गाडी पार्किङ गर्ने सुविधा हुनुपर्ने, प्राविधिक दृष्टिकोणले उपयुक्त घर हुनुपर्ने मन्त्रालयले जनाएको छ ।
यस्तै, घरमा विद्युत, धारा, भान्सा, पानी, शौचालयको सुविधा भएको हुनुपर्ने र बहाल लिने घरमा कम्तीमा ४-५ कोठा हुनुपर्ने सूचनामा जनाइएको छ ।
यी मापदण्ड पुगेका घरधनीले नेपाली नागरिकताको प्रमाणपत्रको प्रतिलिपि, सो घर अवस्थित जग्गाको धनीपुर्जाको प्रतिलिपि, सो घरको स्वीकृत नक्सा तथा निर्माण सम्पन्नको पत्रको प्रतिलिपि, घरजग्गाको लाग्ने हालसम्मको सबै किसिमको कर र दस्तुर तथा पानी, बिजुलीको महसुल चुक्ता गरेको प्रमाणको प्रतिलिपिसहित निवेदन पेश गर्नुपर्ने छ ।
साथै, आफूले भाडामा दिन चाहेको घरजग्गा कति भाडा दरमा दिन सकिने हो ? घर बहाल करसहित मासिक रकम अंक र अक्षरमा स्पष्ट उल्लेख गर्नुपर्ने छ ।
