विराटनगर । मोरङको ग्रामथान गाउँपालिका अध्यक्षका लागि भएको उपनिर्वाचनमा १८ हजार ५७८ मत खसेको छ ।
सहायक निर्वाचन अधिकृत रामराज पौडेलका अनुसार ७१.३ प्रतिशत मत खसेको हो । ग्रामथानमा जम्मा २६ हजार ४४ मतदाता रहेका छन् ।
पौडेलका अनुसार मतदानमा पुरुषभन्दा बढी महिला सहभागी भएका छन् । ९ हजार ६ सय ७७ जना महिला र आठ हजार ९ सय पुरुष मतदानमा सहभागी भएको जानकारी पौडेलले दिए ।
मतदाताको संख्या पनि पुरुषभन्दा महिलाको धेरै थियो । १३ हजार ४१ महिला र १३ हजार ३ पुरुष मतदाता रहेका थिए । मतदातामध्ये ७ हजार ४ सय ६७ जना मतदानमा सहभागी भएनन् ।
गाउँपालिकाका १२ मतदान स्थलमा २९ वटा मतदान केन्द्रमा मतदानको व्यवस्था गरिएको थियो । ती मतदान केन्द्रहरूमा शान्त र भयरहित वातावरणमा निर्वाचन सम्पन्न भएको पौडेलको भनाइ छ ।
उनका अनुसार मतदान सकिएसँगै मुचुल्का तयार गर्ने र मतपेटिका संकलन गर्ने तयारी भइरहेको छ । आजै बेलुकाबाट मतगणना गर्ने तयारी छ ।
तर त्यसअघि सर्वदलिय बैठक बसेर निर्णय गर्नेछ ।
ग्रामथानको गाउँपालिका अध्यक्षका लागि नेपाली कांग्रेसका बलराम सरकार थारू, एमालेका तुलसीराम विश्वास र माओवादीका नमोनारायण माझीबीच त्रिपक्षीय भिडन्त हुने आँकलन गरिएको छ ।
उनीहरूबारे राष्ट्रिय स्वतन्त्र पार्टी (रास्वपा) का नवीनकुमार विश्वास खवास, राष्ट्रिय प्रजातन्त्र पार्टी (राप्रपा)का दिनेशकुमार थन्दार, जनता समाजवादी पार्टी (जसपा)का सुरेशकुमार राजवंशी, जनमत पार्टीका विनोदकुमार माझी, नेकपा एकीकृत समाजवादीका दिलबहादुर विश्वकर्मा र नागरिक उन्मुक्तिका बुद्धिचन विश्वास थारू उम्मेदवार छन् ।
यस्तै, , नेपाल मजदुर किसान पार्टीका पर्शुराम विश्वास थारू र मंगोल नेसनल अर्गनाइजेसनका भरत राई, राष्ट्रिय प्रजातन्त्र पार्टी नेपालका राजु मुसहर, नेपाल समाजवादी पार्टीका धर्मेन्द्रकुमार चौधरी, समावेशी समाजवादी पार्टीका बोधनारायण माझी र स्वतन्त्र नमनारायण चौधरी थारूले पनि अध्यक्षमा उम्मेदवारी दिएका छन् ।
यसअघि निर्वाचित कांग्रेसका जयप्रकाश गच्छदारको मृत्यु भएपछि यहाँ उपनिर्वाचन भएको हो ।
