विराटनगर । मोरङको ग्रामथान गाउँपालिकामा आइतबार हुने उपनिर्वाचनको मौन अवधिमा नेपाली कांग्रेसले निर्वाचन आचारसंहिता उल्लंघन गरेको भन्दै उजुरी परेको छ ।
उपनिर्वाचनको मौन अवधिमा सम्मेलन र भेला गरी कांग्रेसले निर्वाचन आचारसंहिता उल्लंघन गरेको भन्दै निर्वाचन आयोगमा उजुरी परेको हो ।
राष्ट्रिय स्वतन्त्र पार्टी (रास्वपा) ले शनिबार कांग्रेसविरुद्ध निर्वाचन अधिकृतको कार्यालयमा उजुरी दिएको हो ।
कांग्रेसले ग्रामथान गाउँपालिका-६ मा शनिबार बिहान काँग्रेसले भेला र सम्मेलन गरेको रास्वपाको आरोप छ ।
ग्रामथानमा भएको भेलामा नेपाली कांग्रेस नेता गुरुराज घिमिरे सहभागी भएका थिए ।
निर्वाचनको अघिल्लो दिन मान्छे भेला पारेर सम्मेलन गरेको रास्वपाको आरोप छ ।
भेलामा कांग्रेस नेताहरू भेला भएको स्थानको भिडियो खिचेपछि कांग्रेसका कार्यकर्ताले रास्वपा कार्यकर्तालाई हातपातसमेत गरेका थिए ।
रास्वपाबाट आध्यक्षका उम्मेदवार नविन विश्वासले मौन अवधिको समयमा आफ्नो घरनजिकै कांग्रेसले भेला गरेपछि उजुरी गरेको बताए ।
भेलाको भिडियो खिच्न खोज्दा आफ्नो पार्टीका सदस्यमाथि हातपात भएको उनको भनाइ छ ।
भेलाको फोटो भिडियो खिच्न खोज्दा पार्टीका सदस्य प्रकाश घिमिरेमाथि हातपात भएको उनले बताए ।
निर्वाचन आचारसंहिता लागेका बेला २०–२५ जना भेला भएर गतिविधि गर्नु आचारसंहिता विपरित हो भन्दा रास्वपाका सदस्यमाथि हातपात भएको विश्वासले बताएका छन् ।
घटनापछि निर्वाचन अधिकृतको कार्यालयमा उजुरी दिएको उनले बताए ।
रास्वपा कार्यकर्ताले भेलाको समयमा कांग्रेसले पैसा पनि बाँडेको आरोप लगाएका छन् ।
कांग्रेस नेता घिमिरेले भने कुनै भेला र सम्मेलन नगरेको दावी गर्दै पार्टीको सम्पर्क कार्यालयमा बसिरहेको अवस्थामा २–३ जनाले भिडियो खिचेर लगेको जिकिर गरे ।
गत वर्ष नै भएको वडा सम्मेलनको व्यानर कार्यालयमा रहेको भन्दै घिमिरेले उम्मेदवारको कुनै प्रचारप्रसार झल्किने ब्यानर नरहेको र त्यस्तो कार्यक्रम पनि नगरेको बताए ।
ग्रामथापनको निर्वाचन अधिकृतको कार्यालयले रास्वपाको उजुरीपछि त्यसमाथि अनुसन्धान र कार्वाही सुरु गरेको जानकारी दिएको छ ।
