विराटनगर । मोरङको बूढीगंगा गाउँपालिकामा रहेको विराट मेडिकल कलेज शिक्षण अस्पतालले कोशी प्रदेशमा सवैभन्दा बढी सेवाग्राहीलाई सेवा दिएको छ ।
श्रम, रोजगार तथा सामाजिक सुरक्षा मन्त्रालय सामाजिक सुरक्षा कोषले सातौं सामाजिक सुरक्षा दिवसको अवसरमा मंगलबार काठमाडौंमा आयोजना गरेको कार्यक्रममा विराट मेडिकललाई उत्कृष्ट घोषित गरेको हो ।
ओलीले कार्यक्रममा कोषअन्तर्गत बढी योगदानदाता र सेवा दिने विभिन्न व्यक्ति र संस्थालाई पुरस्कार प्रदान गरेका थिए ।
जसमा बूढीगंगाको विराट टिचिङले कोशी प्रदेशबाट उत्कृष्ट ठहरिएको हो ।
आर्थिक वर्ष २०८०/०८१ मा कोशी प्रदेशका सेवा प्रवाह गर्ने स्वास्थ्य संस्थाहरूमध्येबाट उत्कृष्ट विराट मेडिकल कलेजलाई नेपाल सरकार श्रम, रोजगार तथा सामाजिक सुरक्षा मन्त्रालयले सम्मानित गरेको हो ।
प्रधानमन्त्री केपी शर्मा ओलीले विराट मेडिकल कलेज शिक्षण अस्पतालका सिईओ डेनिस कार्कीलाई सम्मानपत्र प्रदान गरे ।
सातौं सामाजिक सुरक्षा दिवस २०८१ को अवसरमा कोषमा सूचीकृत भई आर्थिक वर्ष २०८०/०८१ मा योगदानकर्ताहरूलाई निरन्तर स्वास्थ्य सेवा प्रवाह गर्ने सेवा प्रदायक स्वास्थ्य संस्थाहरूमध्ये कोशी प्रदेशबाट सबैभन्दा बढी सेवाग्राहीलाई स्वास्थ्य सेवा प्रदान गर्ने स्वास्थ्य संस्था बनेको हो ।
तत्कालीन प्रधानमन्त्री ओलीको पालामा २०७५ सालमा यो कार्यक्रम अभियानका रूपमा सुरु भएको थियो ।
कार्यक्रममा सम्बोधन गर्दै प्रधानमन्त्री ओलीले आगामी ९० दिनपछि योगदानकर्ताका छोराछोरीले पनि कोषबाट लाभ पाउने र एक लाखभन्दा बढी उपचार खर्च लाग्ने योगदानकर्तालाई लाग्ने खर्चको ५० प्रतिशत कोषबाट व्यहोरिने घोषणा गरे ।
उनले संविधानमा गरिएको मौलिक हकका व्यवस्था र दायित्वप्रति सरकार जिम्मेवार र जवाफदेही हुने बताउँदै मुलुकलाई गरिबी र पछौटेपन नभएको आधुनिक, विकसित र समृद्ध बनाउने जनाए ।
