नेपाल प्रिमियर लिग (एनपिएल) आबद्ध विराटनगर किंग्सले आफ्नो जर्सी सार्वजनिक गरेको छ । विराटनगरस्थित होटल स्वागतममा मंगलबार साँझ विशेष समारोहको आयोजना गरी विराटनगरले आफ्नो आधिकारिक जर्सी सार्वजनिक गरेको हो ।
कोशी प्रदेश सरकारका मुख्यमन्त्री हिक्मतकुमार कार्की, विराटनगर किंग्सका मालिक पारस लुनिया र मार्की खेलाडी सन्दीप लामिछानेले जर्सी सार्वजनिक गरे ।
सो अवसरमा विराटनगर किंग्सले ब्रान्ड एम्बास्डर तथा र्यापर कुशल पोखरेलको आवाजमा बनेको एन्थम पनि सार्वजनिक गरिएको थियो भने द फेस अफ विराटनगरका रूपमा गायिका रचना रिमाललाई सार्वजनिक गरिएको थियो ।
साथै, यु-१९ महिला क्रिकेट टोलीका मुख्य प्रशिक्षक महेशप्रसाद रिजाल र खेलाडी रिया शर्मालाई सम्मानसमेत गरिएको थियो । महिला विश्वकपमा नेपालको स्थान सुरक्षित गराउन सफल उनीहरूलाई मुख्यमन्त्री कार्की र पारस लुनियाले सम्मान गरे ।
उक्त अवसरमा बोल्दै लुनियाले एनपिएलले खेल क्षेत्रकै लागि यो ठुलो इभेन्ट भएको बताए । नेपालका खेलाडीहरूका लागि पनि एनपिएल ठुलो अवसर भएको सुनाउँदै उनले भने, ‘हामी विराटनगरको मात्र नभएर कोशी प्रदेशकै खेल क्षेत्र अगाडि बढाउन चाहन्छौं ।’
यसैगरी, विराटनगर महानगरपालिका प्रमुख नागेश कोइरालाले एनपिएलमा विराटनगरको सहभागिताले विश्वमाझ विराटनगरको पहिचान उँचो हुनेमा आफू विश्वस्त रहेको बताए ।
नेपाल क्रिकेट संघ (क्यान) को आयोजनामा यही मंसिर १५ गतेदेखि काठमाडौंमा हुने एनपिएलअन्तर्गत पहिलो खेलमै विराटनगरले जनकपुर बोल्टसँग खेल्ने छ ।
विराटनगर किंग्समा लोकेश बम, दीपक बोहरा, सुभास भण्डारी, बिमल गुरुङ, जितेन्द्र मुखिया आदि रहेका छन् ।
अन्तर्राष्ट्रियस्तरमा ख्यातिप्राप्त खेलाडीहरूको सहभागितामा मंसिर १५ देखि पुस ६ गतेसम्म एनपिएल आयोजना हुँदै छ ।
