विराटनगर । नेपाली कांग्रेसका सस्थापक सभापति तथा सन्त नेता कृष्णप्रसाद भट्टराईको स्मृतिमा निर्माणाधीन साततले भवनको काम अन्तिम चरणमा पुगेको छ ।
सन्त नेता कृष्णप्रसाद भट्टराई फाउन्डेसनले विराटनगर महानगरपालिका–४ मा निर्माण गरिरहेको साततले भवनको काम अन्तिम चरणमा पुगेको हो ।
नेपाली कांग्रेसका नेता तथा राष्ट्रियसभाको पूर्वसदस्य रमेशजंग राजयमाझीको अगुवाइमा निर्माण भइरहेको भवन २० माघ २०७८ मा शिलान्यास भएको थियो ।
कृष्णप्रसाद भट्टराईको स्मृतिमा साततले भवन, किसनुजीको पूर्णकदको प्रतीमा, पार्क र सभाहल बनाउनेगरी सोही वर्षको फागुनबाट काम सुरु भएको थियो ।
दुईवटा लिफ्टसहितको उक्त साततले भवनको पाँचतला निर्माण भइसकेको छ भने अरू दुई तला ढलानको काम भइरहेको छ ।
समग्रमा भवन निर्माणको कामको प्रगति हालसम्म ६० प्रतिशत पुगिसकेको छ भने प्रतिमा, पार्क र सहभाहलको काम थाल्ने योजनामा फाउन्डेसन रहेको छ ।
आगामी माघ २० गते उद्घाटन गर्नेगरी तीव्रगतिमा काम गरिरहेको फाउन्डेसनका सदस्य सरोज दाहाल बताउँछन् ।
विराटनगर महानगरपालिका, कोशी प्रदेश सरकार र केन्द्रीय सरकारको सहयोगमा एक बिघा क्षेत्रफलमा २० करोड रुपैयाँ लागत अनुमान गरी भवन निर्माणको काम थालिएको थियो ।
हालसम्म आठ करोड रुपैयाँ खर्च भइसकेको फाउन्डेसनको तथ्यांक छ ।
भवनका केही तलामा नेपाल सरकारको समन्वयमा आश्रमका रूपमा प्रयोजन गर्ने र बाँकी कृष्णप्रसाद भट्टराईबारे अध्ययन–अवलोकनका सामग्री राख्ने योजनामा फाउन्डेसन रहेको छ । विराटनगरले वर्षायाममा डुबानको समस्या झेल्दै आएको छ ।
जसबाट बच्नका लागि उक्त भवन सामुदायिक भवनका रूपमा प्रयोग गर्ने महानगरपालिकाको लक्ष्य रहेको महानगरप्रमुख नागेश कोइराला बताउँछन् ।
कांग्रेस एकीकरणमा अहम् भूमिका निर्वाह गरेका कृष्णप्रसाद भट्टराईको निधन २० फागुन २०६७ मा ८६ वर्षको उमेरमा भएको थियो ।
२०४७ र २०५६ सालमा दुईपटक नेपालका प्रधानमन्त्री बनेका भट्टराईको राजनीतिक जीवनबारे बुझ्न पनि उनको स्मृतिमा भवन, शालिक र पार्क बन्नु आवश्यक रहेको उनीबारे जानकार बताउँछन् ।
गान्धीवादी सन्तनेता मानिने भट्टराईबारे अध्ययन गरी उनलाई नजिकबाट जान्न पनि युवापुस्ताका लागि यस्ता संरचनाको जरुरत रहेको छ ।
भौतिक संरचनाको आधारमा भन्नुपर्दा किसुनजीको स्मरणमा बनेका फाउन्डेसनमध्ये नेपालकै ठुलो रहेको बताइएको छ ।
फाउन्डेसनले यहाँ भट्टराईबारे जान्न आउनेका लागि मिनी हलमा जीवनी प्रसारण गर्ने योजनासमेत लिएको छ ।
