विराटनगर । नेपाल क्रिकेट फाउन्डेसनको आयोजना तथा क्रिकेट विथ बाउन्ड्रीको सहयोगमा प्रथम नेपाल हव महिला टी–२० क्रिकेट प्रतियोगिता सुरु भएको छ ।
प्रतियोगितामा विराटनगर हव महिला टिम र राजविराज हव महिला टिमबीच तीन खेलको टी–२० क्रिकेट प्रतियोगिता हुने खेल संयोजक मन्दिप साहले बताए ।
शनिबार भएको पहिलो खेलमा विराटनगरले राजविराजलाई ३८ रनले पराजित गरि ३ खेलको सिरिजमा विराटनगरले १–० को अग्रता लिएको छ ।
टस हारेर ब्याटिङ गरेको विराटनगरले निर्धारित २० ओभरमा ७ विकेट गुमाई १ सय ५ रन बनाएको थियो ।
विराटनगरकालागि प्लेयर अफ द म्याच टिका साहले ३८ रन बनाउँदा सानु राजवंशीले १२ रन तथा पूर्णिमा राजवंशी र प्रिन्सा मगरले १०–१० रनको योगदान दिइन् ।
राजविराजकी बन्दना रजक, अपेक्षा यादव र साक्षी यादवले २–२ विकेट लिइन् ।
एक सय ५ रनको विजयी लक्ष्य पाएको राजविराजले पुरै ओभर खेल्दै ८ विकेट गुमाई ६७ रन मात्र बनायो ।
राजविराजकी दिपा रामले १४ रन बाहेक अन्य ब्याटरले दोहोरो अंकलाई छुन सकेनन् ।
विराटनगरकी स्मारिका गौतमले ३ विकेट र अंशु मण्डलले २ विकेट इिन् । यी दुइविचको दोस्रो खेल आइतबार हुने छ ।
