विराटनगर । मोरङको ग्रामथान गाउँपालिकाको अध्यक्षका लागि नेकपा एमालेले उम्मेदवारको टुंगो लगाएको छ । नेकपा एमाले प्रदेश कमिटीले शनिबार अध्यक्ष पदका उम्मेदवारको नाम तय गरेको हो ।
कमिटीले अध्यक्षका उम्मेदवारका रूपमा तुल्सीराम विश्वासलाई टिकट दिने निर्णय गरेको हो । विश्वास पार्टीको ग्रामथान गाउँपालिका उपाध्यक्ष हुन् ।
गाउँपालिका कमिटीले ११ जना आकंक्षीको नाम सिफारिस गरेर जिल्लामा पठाएको थियो । जिल्लाले सुझावसहित प्रदेश कमिटीमा नाम पठाएको थियो ।
प्रदेश कमिटीबाट सिफारिस भई आएका उम्मेदवारको नाम शनिबार बसेको सचिवालय बैठकले विश्वासको नाम अनुमोदन गरेको हो ।
यसअघि नै नेपाली कांग्रेस र नेकपा माओवादी केन्द्रले उम्मेदवार तय गरिसकेका छन् । कांग्रेसले बलराम सरदारलाई उम्मेदवार बनाउने निर्णय गरेको छ ।
अध्यक्षका लागि कांग्रेसबाटै १३ जना आकांक्षी रहेकामध्ये सरदारलाई छानिएको हो ।
यसअघि नै माओवादी केन्द्रले भने यसअघि नै पूर्ववडाध्यक्ष नमोनारायण माझीलाई अध्यक्षको उम्मेदवार बनाउने निर्णय गरिसकेको छ ।
माझी कांग्रेस छाडेर माओवादी प्रवेश गरेका हुन् । उनी यसअघि २०७४ सालमा तत्कालीन फोरम लोकतान्त्रिकबाट उम्मेदवार बनेर उनी ग्रामथान गाउँपालिका–१ को वडाध्यक्ष निर्वाचित भएका थिए ।
गत २०७९ सालको निर्वाचनमा स्वतन्त्र रूपमा सोही वडाको अध्यक्षमा उम्मेदवार बनेका थिए । तर, तेस्रो भए ।
कांग्रेस छाडेर माओवादी रोजेपछि अहिले गाउँपालिका अध्यक्षकै उम्मेदवार बन्ने मौका पाएका हुन् ।
ग्रामथानसहित देशका विभिन्न पालिकाहरूमा आगामी मंसिर १६ गते उपनिर्वाचन हुँदै छ ।
२०७९ वैशाख ३० गते भएको चुनावमा निर्वाचित नेपाली कांग्रेसका जयप्रकाश गच्छदार थारूको निधन भएपछि उक्त पद रिक्त छ ।
गत वर्षको माघ १० गते राष्ट्रियसभा निर्वाचनका लागि छलफल गर्न विराटनगरस्थित होटल स्टर्न स्टारमा नेपाली कांग्रेसले आयोजना गरेको कार्यक्रममा सहभागी हुँदै गर्दा बेहोस् भएका थारूको उपचारका क्रममा गत असार ३ गते निधन भएको थियो ।
गच्छदारको निधन भएयता उपाध्यक्ष गुणावतीदेवी थारूले कार्यवाहक अध्यक्षको भूमिका निर्वाह गर्दै आएकी छन् ।
