विराटनगर । मोरङको ग्रामथान गाउँपालिकाको अध्यक्षका लागि आगामी मंसिर १६ गते उपनिर्वाचन हुँदै छ ।
२०७९ वैशाख ३० गते भएको चुनावमा निर्वाचित नेपाली कांग्रेसका जयप्रकाश गच्छदार थारूको निधन भएपछि उक्त पद रिक्त छ ।
गत वर्षको माघ १० गते राष्ट्रियसभा निर्वाचनका लागि छलफल गर्न विराटनगरस्थित होटल स्टर्न स्टारमा नेपाली कांग्रेसले आयोजना गरेको कार्यक्रममा सहभागी हुँदै गर्दा बेहोस् भएका थारूको उपचारका क्रममा गत असार ३ गते निधन भएको थियो ।
गच्छदारको निधन भएयता उपाध्यक्ष गुणावतीदेवी थारूले कार्यवाहक अध्यक्षको भूमिका निर्वाह गर्दै आएकी छन् ।
उक्त रिक्त पदका लागि हुने उपनिर्वाचनमा ठुला भनिएका दलहरूले आफ्ना उम्मेदवार टुंगो लगाउने क्रम जारी छ ।
यसबीचमा, ग्रामथान गाउँपालिका अध्यक्षको उमेदवारका लागि नेकपा एमालेमा तीन जनाको नाम सिफारिस गरिएको छ ।
गाउँपालिका कमिटिीबाट ११ जनाको नाम सिफारिस आएकोमा जिल्लाबाट तुलसी विश्वास, कृष्णकुमार माझी र निर्मला अधिकारीको नाम प्रदेशमा सिफारिस गरिएको एमाले मोरङ इञ्चार्ज जीवन घिमिरेले जानकारी दिए ।
एमाले ग्रामथान गाउँ कमिटीले भने ११ जना आकांक्षीको नाम जिल्ला कमिटीमा सिफारिस गरेको थियो ।
जिल्लाले सुझावसहित प्रदेश कमिटीमा नाम पठाएको बताइएको छ ।
पालिका र जिल्ला पठाएको नामका आधारमा कात्तिक २४ गते उम्मेदवारको नाम टुङ्गो लगाउने एमाले प्रदेश कमिटिले जनाएको छ ।
ग्रामथान गाउँकमिटिले पूर्वअध्यक्ष शिवनारायण माझी, तुलसीराम विश्वास, कृष्णकुमार माझी, एकराज घिमिरे, आसनारायण माझी, तुलसी विश्वास, नमनारायण चौधरी, युवराज खनाल, निर्मला अधिकारी, नवीनकुमार मण्डल र ध्रुवकुमार श्रेष्ठको नाम पनि सिफारिस गरेको थियो ।
शिवनारायण २०७४ को निर्वाचनमा पालिकाको अध्यक्षमा निर्वाचित भएका थिए भने २०७९ को निर्वाचनमा भने जयप्रकाश गच्छदार थारुसँग पराजित भएका थिए ।
उनी उम्मेदवार बन्ने सम्भावना भएपनि केही समय अगाडि जुवा खालबाट पक्राउ परेकोले उनको नाम सिफारिस नभएको एमाले स्रोतले जनाएको छ ।
नेपाली कांग्रेसले बलराम सरदारलाई उम्मेदवार बनाउने निर्णय गरेको छ ।
बिहीबार बसेको समितिको बैठकले पालिकाको अध्यक्षमा सरदारलाई उम्मेदवार बनाउने निर्णय गरेको हो ।
अध्यक्षका लागि कांग्रेसबाटै १३ जना आकांक्षी रहेकामध्ये सरदारलाई छानिएको हो ।
यसअघि नै माओवादी केन्द्रले भने यसअघि नै पूर्ववडाध्यक्ष नमोनारायण माझीलाई अध्यक्षको उम्मेदवार बनाउने निर्णय गरिसकेको छ ।
माझी कांग्रेस छाडेर माओवादी प्रवेश गरेका हुन् । उनी यसअघि २०७४ सालमा तत्कालीन फोरम लोकतान्त्रिकबाट उम्मेदवार बनेर उनी ग्रामथान गाउँपालिका–१ को वडाध्यक्ष निर्वाचित भएका थिए ।
गत २०७९ सालको निर्वाचनमा स्वतन्त्र रूपमा सोही वडाको अध्यक्षमा उम्मेदवार बनेका थिए । तर, तेस्रो भए ।
कांग्रेस छाडेर माओवादी रोजेपछि अहिले गाउँपालिका अध्यक्षकै उम्मेदवार बन्ने मौका पाएका हुन् ।
माझीलाई पूर्वमन्त्री अमनलाल मोदी र विजय विश्वासलगायतको साथ रहेको छ ।
